Алматыда Қазақстанның бұрынғы президентінің жиені Қайрат Сатыбалдыға тиесілі болған бес жұлдызды DoubleTree by Hilton қонақүйі сатылды. Нысан электронды аукционда 12,38 млрд теңгеге бағаланды. Қонақүйді сату үш әрекеттен кейін ғана жүзеге асты, деп хабарлайды dalanews.kz.
Электронды сауда алаңы e-Qazyna.kz мәліметінше, нысанның түпкілікті сату бағасы 12 млрд 384 млн 291 мың 448 теңгені құрады.
Қонақүй үш рет саудаға шығарылды
DoubleTree by Hilton қонақүйін сату бірден жүзеге аспады. Нысан алғаш рет 2026 жылғы 25 қыркүйекте аукционға шығарылды. Бастапқы бағасы 12,7 млрд теңге болғанымен, сатып алуға өтінім түспегендіктен сауда өткізілмеді. 13 қазанда қонақүй екінші рет сатылымға қойылды. Бұл жолы да бастапқы баға 12,7 млрд теңге болып белгіленді. Алайда жалғыз қатысушыға сату мүмкіндігі қарастырылғанына қарамастан, сатып алушы табылмады.
29 қазанда өткен үшінші саудада нысанның бастапқы бағасы 38,2 млрд теңгеге дейін көтерілді. Бірақ бұл жолы бағаны төмендету әдісі қолданылды. Нәтижесінде қонақүй 12,38 млрд теңгеге сатылды. Тәуелсіз бағалау қорытындысы бойынша, ғимараттың нарықтық құны шамамен 12,7 млрд теңге болған.
Қонақүй мемлекет меншігіне қалай өтті?
DoubleTree by Hilton қонақүйі 2023 жылғы қыркүйекте мемлекет меншігіне берілген. Ол кезде Қайрат Сатыбалдыұлы қылмыстық істер аясында келтірілген залалды өтеу мақсатында Алматы қаласының мемлекеттік мүлік департаментімен ғимаратты мемлекетке беру туралы сыйға тарту шартын жасасқан.
Нысан мемлекет меншігіне өткен кезде оның құны 6,49 млрд теңгеге бағаланған.
