ISESKO uiymynyń sheshimimen kieli Túrkistan shahary kelesi jyly Islam áleminiń mádeni astanasy atanbaq. Bul týraly Qasym-Jomart Toqaev Túrki memleketteri uiymynyń 13-sammitinde aitty, dep habarlaidy dalanews.kz.
Memleket basshysy mádeni-gýmanitarlyq yqpaldastyqty odan ári damytý máselesi de áriptestiktiń mańyzdy baǵytynyń biri ekenin aitty.
"Qazaqstan túrki halyqtarynyń tarihi murasyn zerdeleý, saqtaý jáne dáripteý isine airyqsha kóńil bóledi. Men biyl Túrkistanda ótken basqosýda Túrki órkenieti ortalyǵyn jáne dala órkenietin dáripteýge arnalǵan "Máńgilik el" ortalyǵyn qurýdy usyndym. Qazir tiisti jumystar júrgizilip jatyr. Osy oraida, Túrki órkenietiniń murasyn saqtaý jónindegi konventsiiany tezdetip qabyldaǵan jón dep sanaimyz. Sonymen qatar elimizde "Qazaqstan tarihy: ejelgi dáýirden búginge deiin" atty jeti tomdyq aýqymdy eńbek ázirlenip jatyr. Osy jumysqa belsene qatysqan túrki elderiniń ǵalymdaryna shynaiy alǵys bildiremiz. Akademiialyq eńbek tarihi oqiǵalarǵa ǵylymi turǵydan keń aýqymda, shynaiy jáne ádil kózqaraspen qaraýǵa kómektesedi", – dedi Toqaev.
Budan bólek, Qasym-Jomart Toqaev Uiymǵa qarasty qurylymdar da irgeli ister atqaryp jatqanyn atap ótti.
"Túrki akademiiasynyń bastamasymen ortaq tarihi jáne mádeni eskertkishterge arnalǵan birqatar eńbekter jaryq kórdi. Atap aitqanda, "Túrki áleminiń kieli geografiiasy" úsh tomdyǵy, "Kóne túrki jazbalarynyń" bes tomdyq katalogi daiyndaldy. Sondai-aq "Qazirgi túrki tilderi sózdiginiń" 25 tomdyǵy basylyp shyqty. Bul eńbekter – túrki ǵalymdary jumysynyń úlken nátijesi. Sonymen qatar Túrki mádenieti jáne murasy qory Turkic Heritage halyqaralyq tsifrlyq platformasyn daiyndady. Bul biregei tsifrlyq ónim túrki halyqtarynyń tarihyn, ádebietin, mádenietin tanyp-bilýge múmkindik beredi. Túrki áleminiń tarihynda Altaidyń alatyn orny erekshe. Biyl Qazaqstanda "Altai – Túrki áleminiń altyn besigi" halyqaralyq festivali joǵary deńgeide ótti. ISESKO uiymynyń sheshimimen kieli Túrkistan shahary kelesi jyly Islam áleminiń mádeni astanasy atanbaq. Biz osy bastama aiasynda túrki órkenietiniń rýhani úndestigi men sabaqtastyǵyn saqtaýǵa yqpal etetin aýqymdy sharalar ótkizýdi josparlap otyrmyz. Atap aitqanda, ádebiet pen til máselesine arnalǵan Qoja Ahmet Iasaýi halyqaralyq forýmyn, sondai-aq Túrki jáne islam álemi murajai isi mamandarynyń jiynyn ótkizemiz. Ǵalymdarymyzdy osy is-sharalarǵa belsene atsalysýǵa shaqyramyz", – dedi Memleket basshysy.
