Qostanai oblysynyń Áýliekól aýdanynda bes jasar bala aýyr dene jaraqattarynan kóz jumdy. Oqiǵaǵa bailanysty er adam ustalyp, qamaýǵa alyndy, dep habarlaidy dalanews.kz.
Tengrinews.kz málimetinshe, qaiǵyly jaǵdai 26 qazanda bolǵan. Aldyn ala málimet boiynsha, balanyń basy men denesinen kóptegen jaraqat anyqtalǵan. Áýliekól aýdandyq politsiia bólimi Qylmystyq kodekstiń "Jas balany óltirý" baby boiynsha sotqa deiingi tergeý bastady.
Kúdikti oqiǵa bolǵan kúni ustalǵan. Keiin sot ony qamaýda ustaý týraly sheshim shyǵardy. Qostanai oblysynyń prokýratýrasy tergeý barysy baqylaýǵa alynǵanyn málimdedi.
"Qazirgi ýaqytta is boiynsha qajetti tergeý amaldary júrgizilip jatyr. Tergeý múddesine bailanysty ózge aqparat jariialanbaidy", – dep habarlady prokýratýra.
Kúdiktiniń kinási dáleldense, oǵan ómir boiyna bas bostandyǵynan aiyrýǵa deiingi jaza taǵaiyndalýy múmkin.
Jergilikti turǵyndar balanyń ólimine onyń ákesi qatysy bolýy yqtimal ekenin aitqan. Alaida bul aqparatty quzyrly organdar resmi túrde rastaǵan joq.
Qostanai oblysyndaǵy bala quqyqtary jónindegi ýákil Nesibeli Básenovanyń málimetinshe, marqum balabaqshaǵa barǵan. 2026 jyldyń naýryzynan bastap ákesimen birge turǵan, oǵan deiin ájesiniń tárbiesinde bolǵan. Balanyń anasy ata-ana quqyǵynan aiyrylǵan.
Sottyń 2025 jylǵy 28 naýryzdaǵy sheshimi boiynsha bala ákesimen turýy tiis bolǵan. Bastapqyda ájesi nemeresin bermegenimen, ákesi jaldaǵan advokat aralasqannan keiin bala onyń qolyna tapsyrylǵan. Otbasynyń tiisti organdardyń esebinde bolǵan-bolmaǵany qazir anyqtalyp jatyr.
