Shyǵys Qazaqstan oblysy halyqaralyq jastar dialogynyń alańyna ainaldy: aimaqqa Shanhai yntymaqtastyq uiymyna (ShYU) múshe elderdiń jas kóshbasshylarynan quralǵan delegatsiia resmi saparmen keldi.
Bul sapar 2024 jylǵy 4 shildede Astanada ótken «ShYU pliýs» formatyndaǵy sammitte qol jetkizilgen kelisimder aiasynda júzege asýda. Sol kezde Qazaqstan Respýblikasy Prezidenti Qasym-Jomart Toqaev jahandyq syn-qaterler jaǵdaiynda uiymǵa múshe elderdiń birligi men kúsh-jigerin biriktirýdiń mańyzdylyǵyn erekshe atap ótken bolatyn.
Delegatsiia quramyna Qytai Halyq Respýblikasynyń, Resei Federatsiiasynyń, Qyrǵyz Respýblikasynyń, Ózbekstan Respýblikasynyń jáne Tájikstan Respýblikasynyń ókilderi – jas kóshbasshylar, eriktiler men qoǵam qairatkerleri endi. Olardyń saparynyń basty maqsaty – mádenietaralyq dialogty nyǵaitý, jastar arasyndaǵy áriptestikti damytý jáne ortaq bastamalardy ilgeriletý.
Baǵdarlama aiasynda delegattar óńirdiń mádeni murasynyń mańyzdy nysandaryn aralady: Óskemen qalasynyń sol jaǵalaýdaǵy kesheni, Abaidyń úi-murajaiy, etnoaýyl men dástúrli qazaq kiiz úii. Qonaqtar erekshe qyzyǵýshylyq tanytqan sharalardyń biri – «Uly dalanyń altyny» kórmesi boldy. Onda saq-skif dáýirine tán biregei artefaktiler: zergerlik buiymdar, qarý-jaraq elementteri men at ábzelderi kórsetildi.
Sapardyń mańyzdy oqiǵalarynyń biri – Ulan aýdanynda ótken etnofestival. Delegattar qazaqtyń qolónerimen, dástúrli salt-dástúrimen, ulttyq taǵamdarymen jáne folklorymen tanysyp, ulttyq qundylyqtarǵa tereń boilai aldy. Sondai-aq qatysýshylar Ertis ózenimen qaiyqpen serýendep, Óskemen qalasynyń jańa, kórkem qyryn ashty.
Baǵdarlamanyń mańyzdy bóligi – resmi jáne beiresmi kezdesýler. Dialog alańdarynda eriktilik, turaqty damý, ekologiia jáne ShYU elderi jastary arasyndaǵy bailanysty kúsheitý máseleleri talqylandy.
Jaqyn kúnderi is-sharalar jalǵasyn tabady: pikirtalas sessiialary, mádeni sharalar men óńirdiń belsendi jastarymen kezdesýler josparlanǵan. Shyǵys Qazaqstan taǵy da ashyq dialogtyń, halyqaralyq yntymaqtastyq pen ózara túsinistiktiń alańy ekenin dáleldedi.
