Шығыс Қазақстан облысы халықаралық жастар диалогының алаңына айналды: аймаққа Шанхай ынтымақтастық ұйымына (ШЫҰ) мүше елдердің жас көшбасшыларынан құралған делегация ресми сапармен келді.
Бұл сапар 2024 жылғы 4 шілдеде Астанада өткен «ШЫҰ плюс» форматындағы саммитте қол жеткізілген келісімдер аясында жүзеге асуда. Сол кезде Қазақстан Республикасы Президенті Қасым-Жомарт Тоқаев жаһандық сын-қатерлер жағдайында ұйымға мүше елдердің бірлігі мен күш-жігерін біріктірудің маңыздылығын ерекше атап өткен болатын.
Делегация құрамына Қытай Халық Республикасының, Ресей Федерациясының, Қырғыз Республикасының, Өзбекстан Республикасының және Тәжікстан Республикасының өкілдері – жас көшбасшылар, еріктілер мен қоғам қайраткерлері енді. Олардың сапарының басты мақсаты – мәдениетаралық диалогты нығайту, жастар арасындағы әріптестікті дамыту және ортақ бастамаларды ілгерілету.
Бағдарлама аясында делегаттар өңірдің мәдени мұрасының маңызды нысандарын аралады: Өскемен қаласының сол жағалаудағы кешені, Абайдың үй-мұражайы, этноауыл мен дәстүрлі қазақ киіз үйі. Қонақтар ерекше қызығушылық танытқан шаралардың бірі – «Ұлы даланың алтыны» көрмесі болды. Онда сақ-скиф дәуіріне тән бірегей артефактілер: зергерлік бұйымдар, қару-жарақ элементтері мен ат әбзелдері көрсетілді.
Сапардың маңызды оқиғаларының бірі – Ұлан ауданында өткен этнофестиваль. Делегаттар қазақтың қолөнерімен, дәстүрлі салт-дәстүрімен, ұлттық тағамдарымен және фольклорымен танысып, ұлттық құндылықтарға терең бойлай алды. Сондай-ақ қатысушылар Ертіс өзенімен қайықпен серуендеп, Өскемен қаласының жаңа, көркем қырын ашты.
Бағдарламаның маңызды бөлігі – ресми және бейресми кездесулер. Диалог алаңдарында еріктілік, тұрақты даму, экология және ШЫҰ елдері жастары арасындағы байланысты күшейту мәселелері талқыланды.
Жақын күндері іс-шаралар жалғасын табады: пікірталас сессиялары, мәдени шаралар мен өңірдің белсенді жастарымен кездесулер жоспарланған. Шығыс Қазақстан тағы да ашық диалогтың, халықаралық ынтымақтастық пен өзара түсіністіктің алаңы екенін дәлелдеді.
