Jetisý oblysynyń oqýshylary «Aibyn-2026» XII Halyqaralyq áskeri-patriottyq jastar jiynynda top jardy. Jetisýlyq jas chempion sarbazdardy aitýly jeńisimen Qazaqstan Respýblikasynyń Prezidenti Qasym-Jomart Kemeluly Toqaev arnaiy quttyqtap, olardyń joǵary daiyndyǵy men jetistigine zor baǵa berdi, dep habarlaidy dalanews.kz.
Atap ótsek, 21–27 maýsym aralyǵynda Aqmola oblysynyń Shýchinsk qalasyndaǵy Sh. Ýálihanov atyndaǵy Áskeri kolledjge qarasty «Amandyq» oqý poligonynda «Aibyn-2026» XII Halyqaralyq áskeri-patriottyq jastar jiyny ótken bolatyn. Atalǵan halyqaralyq is-sharaǵa 5 memleketten 53 komanda qatysyp, jas sarbazdar áskeri-patriottyq daiarlyq, áskeri-qoldanbaly sport túrleri jáne komandalyq jarystar boiynsha ózara baq synasty.
Jetisý oblysynyń namysyn qorǵaǵan «Jetisý tarlandary» áskeri-patriottyq klýbynyń 15 tárbielenýshisi joǵary daiyndyqtaryn, áskeri sheberlikterin, uiymshyldyǵy men patriottyq rýhyn tanytyp, barlyq kezeńderdiń qorytyndysy boiynsha júldeli I oryndy jeńip aldy.
Jetisýlyq áskeri-patriottyq klýbynyń múshesi, Taldyqorǵan qalasyndaǵy Q. Qasymov atyndaǵy №28 IT mektep-litseiiniń 10-synyp oqýshysy Nurasyl Sharipov bul jarystyń ózine erekshe áser qaldyrǵanyn aitady:
- «Jetisý tarlandary» klýbyna múshe bolǵanyma 5 jyldai ýaqyt boldy. Osy ýaqyt aralyǵynda áskeri baǵyttaǵy tárbie men tártipten kóp nárse úirendim. «Aibyn» baiqaýy óte tartymdy ári qyzyqty ótti. Qarsylastarymyz da osal bolǵan joq, sondyqtan ár kezeń tartysqa toly boldy. Osyndai Halyqaralyq deńgeidegi dodaǵa qatysý bizge úlken tájiribe men motivatsiia syilady. Jarysta komandamyzdyń birliginiń, sheberliginiń arqasynda barlyq kezeńnen súrinbei óttik. Elimizdiń Prezidentin jaqynnan kórip, qolyn qysý – men úshin úlken mártebe ári ómir boiy umytylmaityn sát boldy, - deidi ol.
Jalpy, «Jetisý tarlandary» áskeri-patriottyq klýby 2015 jyly Taldyqorǵan qalasyndaǵy Ýshinskii atyndaǵy №7 orta mekteptiń bazasynda qurylǵan. Klýb búginge deiin «Aibyn» áskeri-patriottyq jastar jiynynda birneshe ret top jarǵan. Atap aitsaq, 2017 jyly I oryndy, 2022 jyly Bas júldeni ielendi, biyl úshinshi ret jeńiske jetip otyr.
