Elordadaǵy mektepterde jazǵy demalys bastalǵaly «Zań jáne tártip» qaǵidasy aiasynda «Qaýipsiz tereze» jáne «Balalar qaýipsizdigi» taqyryptarynda aqparattyq-túsindirý dáristeri ótkizilýde. Ata-analar men oqýshylarǵa arnalǵan is-sharalardy Astana qalalyq bilim basqarmasy, qalalyq politsiia departamenti birlesip uiymdastyrýda,- dep habarlaidy Dalanews.kz
Kezekti osyndai is-shara Sáken Seifýllin atyndaǵy №80 mektep-gimnaziiasynda ótip, oǵan jazǵy lagerde demalyp júrgen balalar men olardyń ata-analary, atalǵan mektep ustazdary qatysty. Jiynda oqýshylarǵa turmysta jáne qoǵamdyq ortada saqtalýy tiis qaýipsizdik erejeleri túsindirilip, quqyqtyq jaýapkershilik týraly aqparat berildi, sonymen qatar qaýipsiz ómir saltynyń mańyzy uǵyndyryldy.
«Qaýipsizdik – ár bala úshin mańyzdy, bul ár eresektiń jaýapkershiligi. Sondyqtan mundai dárister Astana qalasynyń barlyq mektepterinde ótip jatyr. Qazirgi tańda bilim berý oryndarynda Ata-analardy psihologiialyq qoldaý ortalyqtary jumys isteidi. Sol ortalyqta ata-analarmen ótken ashyq suhbat kezinde quqyqbuzýshylyqtyń, sýitsidtiń jáne býllingtiń aldyn alý máselelerin kóterdik. Olardy qazirgi tańda mazalaityn máselelerdi birge sheshýge shaqyrdyq», – deidi Astana qalasy Bilim basqarmasynyń Kámeletke tolmaǵandardyń quqyqtaryn qorǵaý bóliminiń bas mamany Gúlsim Hasenova.
Is-sharanyń baǵdarlamasyna sáikes aldymen balalar qaýipsizdigine arnalǵan interaktivti dáris ótti, sosyn quqyqtyq suraqtar boiynsha mamandardyń túsindirý jumystary júrgizildi, balalarǵa jolda júrý erejeleri túsindirildi.
Lagerde demalyp júrgen bastaýysh synyp oqýshylary «Jas jol saqshylary» kórinisin qoidy.
