Jetisý oblysy qurylǵannan beri Kóksý aýdanynda «Diplommen – aýylǵa» baǵdarlamasy aiasynda 40 meditsina qyzmetkerine turǵyn úi berildi. Atalǵan kezeńde 14 jańa nysan salynyp, 2 nysan kúrdeli jóndeýden ótkizildi. Bul týraly oblys ákiminiń aýdan halqymen kezdesýi kezinde aityldy, dep habarlaidy dalanews.kz.
Sonymen qatar kadr tapshylyǵyn sheshý maqsatynda óńirde qolǵa alynǵan meditsina qyzmetkerlerin qoldaý sharalarynyń arqasynda bir ǵana Kóksý aýdanynyń ózine sońǵy 4 jylda 83 dáriger kelgen. Sonyń nátijesinde aýdanda dáriger tapshylyǵy máselesi sheshildi, ázirge tek 2 akýsher-gineolog qajet.
Óz kezeginde 10 jyldyq tájiribesi bar jalpy tájiribelik dáriger Móldir Shynjyrbai bylai deidi:
– Biz Zyliqa Tamshybai aýylynyń, Keńaral jáne Besqainar aýyldarynyń turǵyndaryna meditsinalyq qyzmet kórsetemiz. Bizdiń ambýlatoriiada akýsher, fizioterapiia, protsedýralyq kabinetter, kúndizgi statsionar, zerthana bar, jedel járdem kóligi qyzmet kórsetedi. Kúndelikti orta eseppen 25–30 naýqasty qabyldaimyz, sonymen qatar tústen keiingi aralaý da júrgiziledi. Kúnine orta eseppen 8 úige baramyz — bul kóbine qarttar, múmkindigi shekteýli jandar jáne balalar. Ambýlatoriiaǵa júrgizilgen jóndeý jumystary meditsinalyq qyzmet sapasyn arttyrýǵa eleýli yqpal etedi. Munda patsientterge de, dárigerlerge de óte qolaily jaǵdai jasalǵan. Jalpy alǵanda, memleket tarapynan aýdan dárigerlerine jaqsy qoldaý kórsetilip otyr, – dedi ol.
Júrgizilgen jumystardyń nátijesi týraly jergilikti turǵyndar da óz pikirlerin bildirdi.
– Bizdiń ambýlatoriia 90-jyldary salynǵan bolatyn. Osy ýaqyt ishinde ǵimarat eskirip, jaǵdaiy jańa talaptarǵa sai kelmeitin kúige túsken edi. Taldaý tapsyrý úshin aýdan ortalyǵyna baratynbyz. Endi kúrdeli jóndeý júrgizilgennen keiin munda barlyq jaǵdai jasalǵan, jalpy yńǵaily, jaryq ári zamanaýi boldy. Zeinet jasyna jetken mamandardyń isin jas mamandar jalǵastyryp otyr. Olardyń barlyǵy óz jumysyna jaýapkershilikpen qarap, naýqastarǵa qurmetpen qaraidy, kez kelgen ýaqytta kómek kórsetýge daiyn, – dedi Z. Tamshybai aýylynyń turǵyny Myrzageldi Qojabergenov.
