Shyǵys Qazaqstan oblysynda 10-12 shilde aralyǵynda Katonqaraǵai aýdanynda ótetin «Altai – túrki áleminiń altyn besigi» halyqaralyq festivaline daiyndyq jalǵasýda. Aýqymdy etnomádeni forýmnyń basty oqiǵalarynyń biri – álemge tanymal qazaqstandyq ánshi Dimash Qudaibergenniń óner kórsetýi bolmaq, dep habarlaidy dalanews.kz.
Uiymdastyrýshylardyń málimetinshe, ónerpaz festivalge qatysýyn rastaǵan. Atalǵan shara Qazaqstannyń resmi týristik is-sharalar kúntizbesine engizilgen. Dimashtyń kontserti óńirge álemniń ár túkpirinen keletin qonaqtar sanyn arttyrady dep kútilýde.
Katonqaraǵai elimizdegi eń kórkem týristik óńirlerdiń biri sanalady. Munda jyl saiyn týrister sany artyp keledi, al júzege asyrylyp jatqan investitsiialyq jobalar zamanaýi týristik infraqurylymnyń damýyna serpin berýde. Óńirde jyl boiy jumys isteitin qonaqúi keshenderi men týristik aýyldar salynyp, taý shańǵysy baǵyttary men ekologiialyq týrizm damyp keledi.
Festival baǵdarlamasy mádeni, sporttyq jáne týristik is-sharalardy qamtidy. Qonaqtardy kontserttik baǵdarlamalar, ulttyq oiyndar, qolónershiler kórmeleri, etnomádeni jobalar jáne túrki halyqtarynyń salt-dástúrlerimen tanystyrý sharalary kútedi.
11 shilde kúni saǵat 19:00-de sahnaǵa Qazaqstan, Ázerbaijan, Majarstan, Qyrǵyzstan, Ózbekstan, Túrkiia, Mońǵoliia, Bashqurtstan jáne Resei Federatsiiasynyń Tyva Respýblikasynan kelgen ónerpazdar shyǵady.
Olardyń qatarynda Efendi, Jax, Aizana, Álisher Bainiiazov, Sevarahon Týlanova, Mýrat Iaprak, Súbedei Samdyn, Hazina, NOX, Tóreǵali Tóreáli jáne Sarmat toptary bar. Keshtiń basty hedlaineri – Dimash Qudaibergen.
Uiymdastyrýshylardyń pikirinshe, festival jarqyn mádeni oqiǵa ǵana emes, sonymen qatar Shyǵys Qazaqstandaǵy týrizm salasynyń damýyna qosymsha serpin berip, óńirdiń elimizdegi jetekshi týristik ortalyqtardyń biri retindegi mártebesin nyǵaitady.
