Tanymal ázilkesh Tursynbek Qabatov jylytý maýsymynyń bastalýyna bailanysty qazaqstandyqtarǵa mańyzdy eskertý jasady. Óner iesi kómirtek totyǵynan ýlanýdyń aldyn alýǵa shaqyryp, ár úide arnaiy gaz datchigi bolǵany durys ekenin aitty, dep habarlaidy dalanews.kz.
Ázilkesh bul týraly Pavlodar qalasynda júrgen kezinde aitqan. Onyń sózinshe, kún sýyta bastaǵandyqtan, jeke turǵyn úilerdiń turǵyndary pesh jaǵyp, baspanalaryn jylytýǵa kirisken.
Alaida jylytý maýsymynda órt qaýipsizdigi talaptaryn saqtamaý aýyr jaǵdailarǵa ákelýi múmkin.
Tursynbek Qabatov ásirese kómirmen jylytylatyn úilerde saqtyq sharalaryn kúsheitý kerektigin eskertti.
"Men qazir Pavlodar qalasyndamyn. Qys bastalyp jatyr. Gaz áli kelmegen, kómir jaǵyp otyrǵan kóp jer úi bar. Ýly tútinniń kesirinen ómirden ótip ketken otbasylar da kezdesedi. Qaýiptiń aldyn alý úshin abai bolyńyzdar. Ýly tútinnen, bále-jaladan saqtasyn sizderdi. Manadai apparat shyqqan eken. Úilerińizge qoiyp qoisańyzdar bolady", – dedi ázilkesh.
Óner iesi turǵyndarǵa ýly gazdy anyqtaityn arnaiy qurylǵy ornatýǵa keńes berdi.
Onyń aitýynsha, mundai apparat qaýipti jaǵdai týyndaǵanda dybystyq belgi berip, úidegi adamdardy, sonyń ishinde uiyqtap jatqandardy da eskerte alady.
