Óskemende Sátbaev dańǵyly men Jibek joly kóshesiniń qiylysynda salynyp jatqan jańa jolairyq qalanyń kólik qozǵalysy eń tyǵyz ýchaskeleriniń birindegi júktemeni azaitýy tiis. Shyǵys Qazaqstan oblysyna jumys sapary barysynda QR Premer-ministriniń birinshi orynbasary Nurlybek Nálibaev nysannyń kólik qozǵalysyn qabyldaýǵa daiyndyǵyn baǵalady, dep habarlaidy dalanews.kz.
Jolairyq arqyly qozǵalysty kezeń-kezeńimen ashý josparlanyp otyr. Kelesi aptada Sátbaev dańǵylynyń boiyndaǵy joǵarǵy jol ótkelimen kólik qozǵalysyn iske qosý kózdelgen. ShQO ákimi Nurymbet Saqtaǵanovtyń aitýynsha, bul úshin Eýropadan qosymsha materialdar jetkizilýi kerek. Qajetti materialdar aldaǵy kúnderi keledi dep kútilýde. Odan keiin qurylys jumystary Esenberlin dańǵyly baǵytynda jalǵasady.
Qozǵalysty ishinara ashýdaǵy basty talap - qaýipsizdik. Qurylys jumystary qoldanystaǵy kólik qozǵalysyna kedergi keltirmei júrgizilýi kerek. Sondyqtan avtokólikterdiń ótýi júrgizýshilerge qolaisyzdyq týdyrmaityndai ári qaýipsizdikke qater keltirmeitindei uiymdastyrylýy qajet.
Nysandy aralaý barysynda Nurlybek Nálibaev qalǵan ýchaskelerdi sáýir aiynyń sońynda asfalt tóseýge daiyndaý mańyzdy ekenin atap ótti. Sonymen qatar qurylys merzimderiniń saqtalýy jáne jumys sapasy qatań baqylaýda bolýy tiis ekenin aitty.
Jobany qarjylandyrý máselesine de nazar aýdaryldy. Qurylystyń jalpy quny - 36 mlrd teńge. Onyń 16 mlrd teńgesi biyl Memleket basshysy men Úkimettiń qoldaýymen bólindi. Qurylysty bekitilgen biýdjet sheńberinde aiaqtaý tapsyryldy.
Jolairyq tolyq paidalanýǵa berilgennen keiin kólik aǵyny eki deńgei boiynsha bólinedi. Joǵarǵy deńgeide Sátbaev dańǵyly boiymen baǵdarshamǵa toqtamai júrýge múmkindik týady. Al tómengi deńgeidegi ainalma jol bes baǵytty ózara bailanystyrady. Joba aiasynda Jibek joly kóshesin alty jolaqqa deiin keńeitý jáne Esenberlin dańǵyly jaǵynan qosymsha kireberis salý da qarastyrylǵan.
Esep boiynsha, jolairyqtyń ótkizý qabileti táýligine 85 myń avtokólikten 200 myńnan astam kólikke deiin artady. Bul oblys ortalyǵynda kólik keptelisin azaityp, qalanyń ár aýdanyndaǵy qozǵalys bailanysyn jaqsartýǵa jáne turǵyndardyń jolǵa jumsaityn ýaqytyn qysqartýǵa múmkindik beredi.
