Almatynyń Almaly aýdanynda Qarasai batyr kóshesiniń boiyndaǵy alleia kórkeitilip jatyr. Joba aiasynda qalanyń ortalyq bóligindegi skverler, sonyń ishinde «Qaraǵaily» saiabaǵy júrginshiler joly arqyly ózara jalǵasady. Bul jóninde Almaly aýdany ákimdiginiń ókilderi málimdedi, dep habarlaidy dalanews.kz.
Alleiany kórkeitýdiń alǵashqy kezeńi 2025 jyly Abylai han dańǵylynan Naýryzbai batyr kóshesine deiingi aralyqta aiaqtaldy. Biyl jumystar Naýryzbai batyr kóshesinen Masanchi kóshesine deiin jalǵasyp jatyr. Bul ýchaskeniń uzyndyǵy 500 metrden asady.
Joba aiasyndaǵy mańyzdy jumystardyń biri buryn meiramhanalardyń biriniń jazǵy terrasasy ornalasqan aýmaqta júrginshiler jolyn qaita ashý. Jergilikti atqarýshy organdarmen júrgizilgen kelissózden keiin mekeme ieleri alleia boiymen emin-erkin júrýge kedergi keltirgen qurylymdy alyp tastady.
Endi turǵyndar bul jerden ainalyp ótpei-aq, týra júre alady. Bul ásirese, erekshe qajettiligi bar adamdarǵa, egde jastaǵy turǵyndar men balalar arbasyn alyp júretin ata-analarǵa qolaily. Bosaǵan aýmaqta kúrdeli qurylys salý qarastyrylmaǵan.
Kórkeitý jumystary kezinde 3 500 sharshy metr aýmaqqa brýschatka tóselip, kóshe jaryǵyna arnalǵan 105 baǵana men demalýǵa arnalǵan 25 oryndyq ornatyldy.
Kelesi kezeńde alleiany kógaldandyrý jumystary qolǵa alynady. Munda iri aǵash kóshetteri men 8 myń buta egilip, 9 myń sharshy metr aýmaqqa kógal tóseledi. Sondai-aq tamshylatyp sýarý júiesi ornatylady.
Bul jumys bitken soń alleianyń keibir bólikteri ózara jalǵasyp, qala ortalyǵyndaǵy qoǵamdyq keńistikterdi biriktiretin birtutas júrginshiler baǵyty paida bolady.
