Almatynyń Medeý aýdanynda kóshelerdi jaryqtandyrý jumystary jalǵasyp jatyr. Jyl basynan beri buryn jaryq bolmaǵan 43 ýchaske qamtyldy. Joba aiasynda 244 baǵana men 303 jaryq shamyn ornatý kózdelgen. Jaryqtandyrý jelileriniń jalpy uzyndyǵy 8,3 shaqyrymnan asady, dep habarlaidy dalanews.kz.
Qazir birqatar ýchaskede jumys aiaqtalyp, qalǵan aýmaqtarda shamdar ornatylyp jatyr. Olardyń qatarynda Qulja tas jolynan Talǵar tas jolyna deiingi Teksai ózeniniń boiy, Shevchenko kóshesi, 28-úi, Montajnik kóshesi, 36-úi, Topolevaia kóshesiniń Esenberlin kóshesinen Ormanov kóshesine deiingi bóligi, Sulýsai shaǵynaýdany jáne Medeý kóshesi, 11-mekenjaiyndaǵy baspaldaq bar.
Buǵan deiin jaryq bolmaǵan Qasym Qaisenov kóshesine de jańa shamdar ornatyldy. Munda 21 baǵana, onyń ishinde eki qos iindi baǵana jáne 23 jaryq shamy ornatyldy. 900 metr ózdiginen kótergish oqshaýlanǵan sym tartylyp, qoldanystaǵy symnyń bir bóligi aýystyryldy.
Bul jumystar júrginshiler men júrgizýshilerdiń qaýipsizdigin arttyryp, keshki jáne túngi ýaqytta júrip-turýǵa qolaily jaǵdai jasaýǵa múmkindik beredi.
