«Samuryq-Energo» AQ basqarma tóraǵasy Qairat Maqsutov qyzmetinen bosatyldy. Kadrlyq sheshim Prezident Qasym-Jomart Toqaevtyń energetika salasyndaǵy máselelerdi qatań synaýynan keiin qabyldandy, dep habarlaidy dalanews.kz.
«Samuryq-Qazyna» qory basqarmasynyń sheshimimen Qairat Maqsutov «Samuryq-Energo» AQ basqarma tóraǵasy qyzmetinen ketti. Ol kompaniiany 2023 jyldyń maýsym aiynan beri basqarǵan.
Qyzmetinen bosatýǵa strategiialyq investitsiialyq jobalardyń baiaý júzege asyrylýy, sondai-aq jańa elektr qýatyn óndiretin nysandardyń qurylysy men olardy paidalanýǵa berý merzimderiniń tiisti deńgeide qadaǵalanbaýy sebep bolǵan.
Bul sheshim Memleket basshysy Qasym-Jomart Toqaevtyń Qazaqstan halqyna Joldaýynan keiin qabyldanyp otyr.
Prezident Joldaýynda eldiń energetika salasyndaǵy jaǵdaidy qatań synǵa alǵan edi. Atap aitqanda, Qazaqstanda elektr energiiasynyń tapshylyǵy uzaq jyldar boiy sheshilmei kele jatqanyn, sondai-aq kórshi eldermen elektr energiiasyn tiimsiz sharttarmen almasý tájiribesi qalyptasqanyn aitqan.
Budan bólek, Memleket basshysy Almaty, Túrkistan, Qyzylorda jáne Ekibastuz qalalarynda jańa elektr qýatyn óndiretin nysandardy iske qosý merzimderiniń saqtalmaǵanyna nazar aýdarǵan.
Aita keteiik, «Samuryq-Energo» kompaniiasy eldegi birqatar iri energetikalyq jobany júzege asyrýǵa jaýapty. Olardyń qatarynda Almatydaǵy №2 jáne №3 jylý elektr ortalyqtaryn gazǵa kóshirý, sondai-aq Ekibastuzdaǵy memlekettik aýdandyq elektr stantsiialaryn jańǵyrtý jáne keńeitý jobalary bar.
Osylaisha, Prezidenttiń energetika salasyna qatysty synynan keiin saladaǵy alǵashqy kadrlyq ózgeristerdiń biri jasaldy.
