Qazaqstanda reformalardy tabysty júzege asyrý úshin zańdardy jetildirýmen qatar, qoǵamnyń sanasyn jańǵyrtyp, jańa etikany qalyptastyrý qajet, dep habarlaidy dalanews.kz.
Aqorda málimetinshe, bul týraly Prezident Qasym-Jomart Toqaev Qazaqstan halqyna Joldaýynda málimdedi.
Memleket basshysy «Adal azamat» ideologiiasy qoǵam ómiriniń ajyramas bóligine ainalýy kerektigin atap ótti.
«Otanshyl bolý – zańdy qurmetteý, tártipke baǵyný, el igiligi úshin tabandy eńbek etý degen sóz. Zańǵa qurmetpen qaraityn adam árqashanda tabysty bolady», – dedi Prezident.
Toqaevtyń aitýynsha, Qazaqstan ár azamattyń damýyna jol ashatyn, barshaǵa teń múmkindik beretin, birligi bekem, ádiletti ári órkenietti memleket bolýy kerek.
Sondai-aq Memleket basshysy qazirgi zamanda bilim men ǵylymnyń, ozyq innovatsiialar men jańa tehnologiialardyń mańyzy artyp otyrǵanyn aitty. Onyń sózinshe, jasandy intellektini tereń meńgergen el ǵana damýdyń jańa deńgeiine kóterile alady.
«Memleketimizge myqty ǵalymdar, kásibi injenerler, ulaǵatty ustazdar men bilikti dárigerler árqashanda kerek bolady. Men ultymyzdyń kóshin alǵa bastai alatyn otanshyl azamattarǵa zor úmitpen qaraimyn», – dedi Qasym-Jomart Toqaev.
Joldaýdyń qorytyndy sózinde Prezident el aldynda turǵan tarihi mindetterdi tabysty júzege asyrý qajettigin aityp, ár azamattyń damýyna jáne qoǵamnyń órkendeýine múmkindik beretin Ádiletti Qazaqstan qurý maqsatyn atap ótti.
«Otanymyz – Qazaq eli máńgi jasasyn!» – dep túiindedi Memleket basshysy.
