Qazaqstanda Qarmet kásipornyna uqsas metall óndiristerin taǵy úsh oblysta ashý josparlanǵan. Prezident Qasym-Jomart Toqaev mundai sheshimderdiń ekonomikalyq tiimdiligine kúmán keltirip, óndiristi óńirlerdiń qajettiligine sai josparlaýdy tapsyrdy, dep habarlaidy dalanews.kz.
Aqorda málimetinshe, Memleket basshysy eldiń jahandyq óndiris tizbegine qosylýy úshin sirek kezdesetin jáne tústi metaldardyń ulttyq qoryn qalyptastyrý qajettigin atap ótti. Sonymen qatar eksporttyq saiasatty osy maqsatqa sai júrgizip, damyǵan eldermen strategiialyq seriktestik ornatý kerektigin aitty.
Prezident jańa kásiporyndar jergilikti biznestiń jumysyna orynsyz kedergi keltirmeýi kerek ekenin eskertti. Onyń aitýynsha, investitsiia tartý kezinde ár óńirdiń ereksheligin, salalyq qajettiligin jáne naryqtaǵy suranysty muqiiat zertteý qajet.
«Elimizde metall óndiretin Qarmet degen iri kásiporyn bar. Soǵan qaramastan, taǵy úsh oblysta dál osyndai óndiris oryndaryn ashý josparlanǵan. Osy kásiporyndardyń ónimi naryqtyń suranysyna ie bola ma? Bul suraqqa naqty jaýap joq siiaqty. Sondyqtan osyndai úilesimsiz sheshimderdiń paidasy kúmándi ekenine daý joq», – dedi Qasym-Jomart Toqaev.
Memleket basshysy óńirlerdiń jekelegen kásiporyndarǵa táýeldi bolyp qalmaýy kerektigin aityp, óndiris tóńireginde bilim berý, qoldanbaly ǵylym, logistika, qyzmet kórsetý, sabaqtas óndirister men tehnologiialyq kásipkerlikti qamtityn tutas ekojúie qalyptastyrýdyń mańyzyn atap ótti.
Aýyl sharýashylyǵyn qarjylandyrý
Prezident aýyl sharýashylyǵyn odan ári damytý úshin fermerlerge uzaq merzimdi investitsiialyq qarjy usynatyn tiimdi tetikter qajet ekenin aitty.
Ótken jyly aýyl sharýashylyǵy shamamen 6%-ǵa ósip, agroónerkásip keshenindegi ónim kólemi 15 trln teńgege jetken. Jeńildetilgen sharttarmen qarjylandyrý kólemi 1 trln teńgeden 1,5 trln teńgege deiin ulǵaiǵan.
Alaida bólingen qarajattyń bir bóligi kúndelikti qajettilikter men ainalym qarajatyn tolyqtyrýǵa jumsalyp otyr. Osyǵan bailanysty Úkimetke fermerlerdi uzaq merzimdi investitsiialyq resýrstarmen qamtamasyz etýdiń pármendi tásilderin engizý tapsyryldy.
Sonymen qatar «Báiterek» holdingi taǵam ónerkásibinde jalpy quny 500 mlrd teńgeden asatyn perspektivaly jobalar tizimin ázirlegen.
Toqaev sapaly jobalardy iske asyrý úshin qoljetimdi ári jeńildetilgen qarjylandyrýdy sozbalańǵa salmai, qajetti qarajatty jedel bólýdiń mańyzyn atap ótti.
Budan bólek, Prezident otandyq óndiristegi tehnologiialyq turǵydan ozyq traktorlar men kombaindardyń sanyn arttyryp, aýyl sharýashylyǵyn tehnologiialyq jańǵyrtýdy tapsyrdy.
