Prezident Qasym-Jomart Toqaevtyń Qazaqstan halqyna arnaǵan Joldaýy aiaqtaldy. Memleket basshysy 90 minýtqa jýyq sóz sóilep, eldiń áleýmettik-ekonomikalyq damýy, infraqurylymdy jańǵyrtý, tsifrlandyrý jáne jasandy intellektini damytý máselelerine toqtaldy. Sondai-aq aldaǵy reformalardy júzege asyrý úshin qoǵam sanasyn jańǵyrtýdyń mańyzyn atap ótti, dep habarlaidy dalanews.kz.
Prezidenttiń aitýynsha, eldegi ózgeristerdiń nátijeli bolýy tek zańdardy jetildirý men saiasi institýttardy nyǵaitýǵa bailanysty emes. Ol úshin qoǵamda jaýapkershilik, adaldyq jáne eńbekqorlyq qaǵidattary ornyǵýy qajet.
"Jalpy, kez kelgen reformany iske asyrý úshin zańdardy jetildirý, saiasi institýttardy nyǵaitý jetkiliksiz. Eń aldymen, sana jańǵyrýǵa tiis. Elimiz ornyqty damýy úshin qoǵamda jańa etika ornyǵýy qajet. «Adal azamat» ideologiiasy ómirimizdiń ajyramas bóligine ainalýy kerek", – dedi Toqaev.
Memleket basshysy otanshyldyqtyń máni elge adal qyzmet etý, zańdy qurmetteý jáne qoǵam igiligi úshin eńbek etýmen ólshenetinin jetkizdi.
"Al otanshyl bolý – zańdy qurmetteý, tártipke baǵyný, el igiligi úshin tabandy eńbek etý degen sóz. Zańǵa qurmetpen qaraityn adam árqashanda tabysty bolady", – dedi Prezident.
Sonymen qatar Toqaev qazirgi zamanda memlekettiń básekege qabilettiligi bilim, ǵylym jáne tehnologiialyq jetistikterge tikelei bailanysty ekenin atap ótti. Onyń sózinshe, jasandy intellekt pen jańa tehnologiialardy meńgergen elderdiń damý múmkindigi joǵary.
Prezident Qazaqstanǵa bilikti ǵalymdar, kásibi injenerler, ustazdar men dárigerler árdaiym qajet bolatynyn aityp, el bolashaǵyn bilimdi ári otanshyl azamattarmen bailanystyrdy.
"Men Qazaqstan árbir azamattyń damýyna jol ashatyn, jalpyǵa birdei múmkindik beretin, birligi bekem, Ádiletti ári Órkenietti memleket bolýyn tileimin. Atalǵan maqsatqa jetý úshin bar kúsh-jigerimdi salyp kelemin jáne aldaǵy ýaqytta da solai bolady", – dedi Memleket basshysy.
Joldaýyn qorytyndylaǵan Qasym-Jomart Toqaev el aldynda turǵan mindetterdi birlese júzege asyrý qajettigin atap ótti.
"Búgin men elimizde jasalyp jatqan aýqymdy ózgeristerge keńinen toqtaldym. Jarqyn bolashaǵymyzdy aiqyndaityn mańyzdy bastamalar jóninde aittym. Aldymyzda turǵan tarihi mindetterdi tabysty júzege asyrýymyz kerek. Biz ár azamattyń damýyna, barsha jurttyń órkendeýine jol ashatyn berekeli qoǵam, Ádiletti Qazaqstandy mindetti túrde quramyz", – dedi Prezident.
Memleket basshysy sóziniń sońynda qazaqstandyqtarǵa amandyq pen tabys tilep, Joldaýyn "Otanymyz – Qazaq eli máńgi jasasyn!" degen sózben aiaqtady.
