Memleket basshysy memlekettik kómek shyn muqtaj adamdarǵa ǵana berilýge tiis ekenin málimedi. Úkimettiń aldynda turǵan basty mindettiń biri - osy, dep habarlaidy dalanews.kz.
Prezidenttiń aitýynsha, bul salada ózekti máseleler az emes, soǵan bailanysty Úkimet óz usynysyn, sheshimderin berip jatyr.
"Qazir qoǵamda osy máseleler boiynsha qyzý talqy júrip jatyr. Azamattar ózderin alańdatqan máselelerdi ashyq aitýda. Sondyqtan bul kúrdeli máseleni «ógizdi óltirmei, arbany syndyrmai», baiyppen, salmaqty kózqaraspen sheshý qajet. Artyq qylamyn dep, tyrtyq qylýǵa múldem bolmaidy. Kez kelgen reforma tereń saraptalyp, muqiiat zerttelip, azamattardyń jaǵdaiyn meilinshe eskere otyryp júrgizilýge tiis. Áleýmettik kómektiń jańa tásilderin, soǵan qatysty aqparattyq júielerdiń qyzmetin aldyn ala muqiiat tekseristen ótkizý qajet. Eń durysy, ondai jobalardy áýeli pilottyq rejimde iske qosyp, tiimdiligi rastalǵan soń ǵana keń aýqymda qoldaný kerek.
Túptep kelgende, áleýmettik memleket degenimiz – azamattardy áleýmettik tólemderge táýeldi etý emes, bul, eń aldymen, halyqtyń turmys sapasyn, ál-aýqatyn arttyrý degen sóz. Sondyqtan biz adam kapitalynyń sapasyn jaqsartýǵa jáne óskeleń urpaqtyń jan-jaqty damýyna qolaily jaǵdai jasaýǵa basa mán berip otyrmyz", - dedi Toqaev.
