Qazaqstan prezidenti Qasym-Jomart Toqaev Úkimetke jyl sońyna deiin tsifrlyq jumyspen qamtýdyń jeńildetilgen quqyqtyq rejimin ázirleýdi tapsyrdy. Bul týraly memleket basshysy Joldaýda aitty, dep habarlaidy dalanews.kz.
Prezidenttiń sózinshe, Qazaqstan jasandy intellektini kommertsiialandyrý, aktivterdi tokendeý, blokchein tehnologiialary men tsifrlyq platformalyq ekojúielerdi damytý jumystaryn endi ǵana qolǵa aldy. Endigi mindet – tsifrlandyrýdy ekonomikada is júzinde qoldaný baǵdarlamasyn ázirleý.
Toqaev Qazaqstannyń tsifrlyq qyzmetterdi damytýda birqatar ozyq elden alda ekenin atap ótti. Qazir milliondaǵan azamat marketpleisterdi, tamaq jetkizý qyzmetterin, taksi shaqyrý platformalaryn jáne banktik servisterdi kúndelikti paidalanady.
Memleket basshysynyń aitýynsha, elde ónimdiligi joǵary tsifrlyq ekonomikany damytýǵa qajetti jaǵdailar bar. Qazaqstan jastary bilimdi ári kreativti, internet qoljetimdi, tsifrlyq infraqurylym qalyptasqan.
«Búginde kez kelgen azamat birneshe minýttyń ishinde bank shotyn ashyp, bólip tóleýdi rásimdei alady nemese úiden shyqpai-aq taýar satyp alady», – dedi prezident.
Tsifrlandyrýdyń jańa kezeńi qandai bolady?
Toqaevtyń pikirinshe, tsifrlandyrýdyń kelesi kezeńinde azamattarǵa qyzmetterge qol jetkizý múmkindigin berýmen shektelmei, olardyń jeke áleýetin keńeitýge basymdyq berý qajet.
«Bizge paradigmany ózgertip, aldymyzda turǵan mindetterge basqa qyrynan qaraý kerek. Bizdiń maqsatymyz – halyqqa qyzmet etetin shynaiy tsifrlyq ekonomikany qurý», – dedi ol.
Prezident internetti tek tutyný men kóńil kóterý keńistigi retinde qabyldamaý keregin atap ótti. Onyń ornyna jeli eńbek etý men jańa múmkindikter jasaýǵa arnalǵan ortaǵa ainalýy tiis.
Sondai-aq memleket basshysy smartfondardy ýaqyt ótkizetin qural ǵana emes, tiimdi jumys quraly retinde paidalanýǵa shaqyrdy.
Osyǵan bailanysty Úkimetke jyl sońyna deiin tsifrlyq jumyspen qamtýdyń jeńildetilgen quqyqtyq rejimin qalyptastyrý mindeti júkteldi.
