Prezident Qasym-Jomart Toqaev Qazaqstannyń halyqaralyq kólik jáne logistika salasyndaǵy múmkindikteri tolyq paidalanylmai otyrǵanyn aitty. Memleket basshysy shekaradaǵy uzyn-sonar kólik keptelisin, jol boiyndaǵy infraqurylymnyń jetkiliksizdigin jáne áýe tasymaly salasyndaǵy naqty nátijelerdiń joqtyǵyn synǵa aldy, dep habarlaidy dalanews.kz.
Prezidenttiń aitýynsha, Qazaqstannyń Eýraziiadaǵy iri tranzittik ortalyqqa ainalýy úshin eń aldymen sapaly avtomobil joldary men zamanaýi qyzmet kórsetý infraqurylymy qajet.
"Eske salamyn: sapaly joldar men zamanaýi jol boiyndaǵy qyzmet kórsetý infraqurylymy bolmasa, Qazaqstan jahandyq tranzittik dáliz nemese Eýraziianyń kólik-logistikalyq toraby mártebesine úmitker bola almaidy. Máseleniń máni osynda. Bul túitkil qalai bolǵanda da sheshilýi tiis", – dedi Toqaev.
Memleket basshysy shekara beketterindegi jaǵdaiǵa da toqtaldy. Onyń sózinshe, ótkizý pýnktterinde qalyptasqan kóp shaqyrymdyq keptelister eldiń tranzittik áleýetin damytýǵa kedergi keltirip otyr.
"Eger shekara kóp shaqyrymǵa sozylǵan kólik keptelisin týdyratyn tar ótkelge ainalsa, al qazir dál osyndai jaǵdai bolyp otyr, Qazaqstannyń qandai da bir kóshbasshylyǵy týraly sóz qozǵaýdyń ózi artyq", – dedi Prezident.
Sonymen qatar Toqaev Qazaqstannyń geografiialyq ornalasýy halyqaralyq áýe tasymalyn damytýǵa úlken múmkindik beretinin atap ótti. Eýropa men Aziiany bailanystyratyn mańyzdy áýe dálizderi elimizdiń aýmaǵy arqyly ótedi. Alaida bul artyqshylyq ázirge tolyq ekonomikalyq paida ákelmei otyr.
Prezidenttiń pikirinshe, halyqaralyq áýe tasymalynan tabys tabý úshin jerústi qyzmet kórsetý infraqurylymyn damytý qajet. Bul álemdik tájiribede keńinen qoldanylatyn tásil.
"Bizdiń aýmaǵymyz arqyly Eýropa men Aziia arasyndaǵy negizgi áýe dálizderi ótedi. Bul – orasan zor básekelestik artyqshylyq. Alaida ázirge ol ádemi bezendirilgen tanystyrylymdarda ǵana qalyp otyr. Osy múmkindikti is júzinde paidalaný úshin jerdegi qyzmet kórsetý infraqurylymyn damytý qajet. Bul – álemdik tájiribe. Al qazir qyrýar tabys týra maǵynasynda elimizdiń ústinen ushyp ótip jatyr", – dedi Memleket basshysy.
Osy oraida Prezident jekemenshik "Air Cargo" kompaniiasynyń jumysyna jeke toqtaldy. Onyń aitýynsha, kompaniianyń qarjylai múmkindigi mol, sheteldik bilikti mamandardy jumysqa tartyp, olarǵa joǵary eńbekaqy tóleýge de qaýqarly. Sondai-aq derbes sheshim qabyldaýǵa múmkindigi bar.
Alaida Toqaev kompaniianyń jumysynan ázirge naqty nátije kórinbei otyrǵanyn synǵa aldy.
"Jekemenshik "Air Cargo" kompaniiasyna úlken úmit artylyp otyr. Onyń qarjylandyrý múmkindigi joǵary, sonyń ishinde sheteldik jetekshi mamandardyń eńbekaqysyn tóleýge de qaýqarly. Kompaniia sheshimderdi óz betinshe qabyldai alady. Biraq ázirge sheshim de, nátije de joq. Sizderge senim artyldy, endi naqty nátije kútemiz", – dedi Prezident.
