Astanada Respýblika kúnine orai «Qazanat» ippodromynyń aýmaǵynda aýyl sharýashylyǵy ónimderiniń jármeńkesi ótip jatyr. Munda Qaraǵandy jáne Qostanai oblystarynan jetkizilgen ónimder usynylǵan, dep habarlaidy dalanews.kz.
Jármeńkege eki óńirden 140-tan astam aýyl sharýashylyǵy taýar óndirýshisi men kásiporyn qatysyp jatyr. Sórelerde et, sút ónimderi, kartop, kókónis, un, jarma, makaron ónimderi jáne basqa da azyq-túlik túrleri bar.
«Jármeńkege Qaraǵandy oblysynan ónim alyp keldik. Munda et, sút ónimderi jáne basqa da azyq-túlik túrleri usynylǵan. Mundai sharalar óndirýshilerge óz ónimin tikelei tutynýshyǵa satýǵa múmkindik beredi. Al turǵyndar ónimdi deldalsyz satyp ala alady. Suranys jaqsy bolady dep úmittenemiz», – deidi satýshy.
Uiymdastyrýshylardyń málimetinshe, eki oblys elordaǵa jalpy kólemi 1 myń tonnaǵa jýyq ónim jetkizgen. Onyń ishinde Qaraǵandy oblysy 583 tonnadan astam, al Qostanai oblysy 400 tonnadan astam ónim usynǵan.
«Mundai jármeńkelerdiń uiymdastyrylǵany jaqsy. Bir jerden et, sút ónimderin, kókónis pen basqa da azyq-túlikti tańdap alýǵa bolady. Eń bastysy, baǵasy dúkendermen salystyrǵanda qoljetimdi bolsa eken. Otandyq óndirýshilerdiń ónimin tikelei satyp alý da tiimdi dep oilaimyn», - dep atap ótti qala turǵyny Aisulý Habieva
Qaraǵandy oblysynan 310 tonna kartop, 134,7 tonna et, 80 tonna kókónis, 15 tonna sút ónimi jáne basqa da taýarlar ákelingen. Sonymen qatar 310 myń dana taýyq jumyrtqasy jetkizilgen.
Qostanai oblysynyń ónimderi qatarynda et, sút ónimderi, shujyq, jarma, makaron, kartop, kókónis pen un bar. Sondai-aq kelýshiler nan-toqash jáne konditerlik ónimderdi, sýsyndar men baldy satyp ala alady.
«Jármeńkege qajetti azyq-túlikti alý úshin keldim. Munda tańdaý bar, ártúrli ónimdi salystyryp, ózimizge keregin satyp alýǵa bolady. Osyndai jármeńkeler jii uiymdastyrylsa jaqsy bolar edi. Ásirese baǵa qoljetimdi bolsa, turǵyndarǵa tiimdi», – dedi satyp alýshy Ainur Týrlieva.
Jármeńkeniń maqsaty – qala turǵyndaryna sapaly azyq-túlikti qoljetimdi baǵamen usyný, otandyq óndirýshilerdi qoldaý jáne ónimdi deldalsyz satýǵa múmkindik jasaý.
Aýyl sharýashylyǵy jármeńkesi 24-25 qazanda saǵat 09:00-den 18:00-ge deiin Qarqaraly tasjoly, 1 mekenjaiynda ótedi.
