Qazaqstanda merzimdi áskeri qyzmettiń jańa júiesin engizý josparlanyp otyr. Endi sarbazdar áskerdegi alǵashqy alty aiyn arnaiy oqý ortalyqtarynda ótkizip, qalǵan jarty jylda áskeri bólimderde qyzmet etpek. Sonymen qatar jastarǵa jasandy intellektini meńgerip, azamattyq mamandyq igerýge múmkindik beriledi.
Prezident Qasym-Jomart Toqaevtyń tóraǵalyǵymen ótken Qaýipsizdik Keńesiniń otyrysynda maquldanǵan áskeri reforma josparyn júzege asyrý bastaldy.
Qorǵanys ministrliginiń málimetinshe, ózgerister armiianyń qurylymynan bastap, áskeri qyzmetshilerdiń qaýipsizdigine, daiarlyq sapasyna jáne áleýmettik jaǵdaiyna deiingi birqatar mańyzdy baǵytty qamtidy.
Reformanyń basty maqsaty – zaman talabyna sai, tehnologiialyq turǵydan damyǵan ári áskeri qyzmetshiler úshin qaýipsiz armiia qalyptastyrý.
Áskeri qyzmet eki kezeńge bólinedi
Jańa júiege sáikes, merzimdi áskeri qyzmet burynǵydai bir jylǵa sozylǵanymen, ony ótkerý tártibi ózgeredi.
Alǵashqy alty aida áskerge shaqyrylǵan azamattar arnaiy oqý ortalyqtarynda daiarlyqtan ótedi. Bul ýaqytta sarbazdar áskeri ortaǵa beiimdelip, bastapqy áskeri bilim alady jáne dene daiyndyǵyn jetildiredi.
Sonymen birge olarǵa shet tilderin úirenýge, jasandy intellekt tehnologiialaryn paidalanýǵa jáne eńbek naryǵynda suranysqa ie azamattyq kásipterdi meńgerýge múmkindik jasalmaq.
Al kelesi alty aida sarbazdar áskeri bólimderge jiberiledi. Onda olar jaýyngerlik daiarlyǵyn jetildirip, áskeri tapsyrmalardy oryndaýǵa mashyqtanady.
Jańa tásildiń keibir elementteri buǵan deiin "Sarbaz+" jobasy aiasynda synaqtan ótkizilgen.
Qorǵanys ministrligi eki kezeńdi merzimdi áskeri qyzmet modelin 2027 jyly pilottyq joba retinde iske qosýdy josparlap otyr.
Áskerde jasandy intellekt pen jańa tehnologiialar qoldanylady
Áskeri reforma aiasynda armiiany tehnologiialyq turǵydan jańǵyrtýǵa basymdyq beriledi.
Atap aitqanda, ushqyshsyz ushý apparattaryna qarsy qorǵanys júielerin damytý, jasandy intellekt pen tsifrlyq tehnologiialardy engizý kózdelgen.
Sondai-aq áskeri daiyndyq kezinde urys qimyldaryn kompiýter arqyly modeldeitin arnaiy simýliatsiialyq baǵdarlamalar qoldanylmaq.
Bul sarbazdarǵa túrli jaýyngerlik jaǵdailardy qaýipsiz jaǵdaida pysyqtaýǵa, jańa taktikalardy meńgerýge jáne oqý-jattyǵý shyǵyndaryn azaitýǵa múmkindik beredi.
Sarbazdardyń quqyǵyn qorǵaityn táýelsiz keńesshiler paida bolady
Reformada áskeri qyzmetshilerdiń qaýipsizdigi men quqyqtaryn qorǵaý máselesine erekshe kóńil bólingen.
Osy maqsatta áskeri bólimderdiń qolbasshylyǵyna táýelsiz keńesshiler institýtyn qurý josparlanyp otyr.
Olar sarbazdardyń quqyqtarynyń saqtalýyn baqylaýǵa, zańbuzýshylyqtardy anyqtaýǵa jáne áskeri qyzmetshilerge qajetti qoldaý kórsetýge kómektesedi. Sonymen qatar áskerdegi tártip pen komandirlerdiń jaýapkershiligin kúsheitý kózdelgen.
Qorǵanys ministrligi sarbazdardy sapaly tamaqpen, áskeri kiim-keshekpen qamtamasyz etý máselesi de basty nazarda bolatynyn málimdedi. Budan bólek, kazarmalardy, oqý ǵimarattaryn jáne áskeri poligondardy jóndeý men jańartý josparlanǵan.
Mektep oqýshylaryn áskeri daiarlaý júiesi de ózgeredi
Jańa ózgerister tek ásker qataryndaǵy azamattarǵa ǵana qatysty emes.
2027 jyldan bastap elimizde "Jas aibyn" atty biryńǵai áskeri-patriottyq daiarlyq júiesin qurý kózdelip otyr.
Ol "Jas qyran", "Jas ulan" jáne "Jas sarbaz" kezeńderin biriktiredi.
Jańa júie aiasynda oqýshylarǵa qaýipsiz minez-qulyq erejeleri, alǵashqy meditsinalyq kómek kórsetý jáne tótenshe jaǵdailar kezinde durys áreket etý daǵdylary úiretilmek.
Sondai-aq mektepterdegi alǵashqy áskeri daiyndyq sapasyn arttyrý jáne mamandandyrylǵan áskeri mektepter jelisin damytý jumystary jalǵasady.
Jańa áskeri tártip qashan kúshine enedi?
Qorǵanys ministrliginiń josparyna sáikes, reformany júzege asyrý birneshe kezeńge bólingen.
2026 jyldyń sońyna deiin negizgi uiymdastyrý jumystary júrgiziledi.
Al 2027 jyly eki kezeńdi merzimdi áskeri qyzmettiń pilottyq jobasyn iske qosý kózdelip otyr. Reformanyń ózge baǵyttary kezeń-kezeńimen júzege asyrylady.
Demek, jańa model ázirge búkil Qazaqstan armiiasyna birden engizilip jatqan joq. Onyń tiimdiligi aldymen pilottyq joba aiasynda tekseriledi.
Qorǵanys ministrligi aldaǵy ýaqytta áskeri reformanyń oryndalý barysy jóninde qoǵamǵa turaqty túrde aqparat berip otyratynyn jetkizdi.
