Resei Prezidenti Vladimir Pýtin Qazaqstan Prezidenti Qasym-Jomart Toqaevty ulttyq mereke – Respýblika kúnimen quttyqtady, dep habarlaidy dalanews.kz.
Quttyqtaý hatynda Qazaqstannyń ekonomikalyq jáne áleýmettik saladaǵy jetistikterin atap ótip, eldiń halyqaralyq arenadaǵy bedeline joǵary baǵa bergen.
«Qurmetti Qasym-Jomart Kemeluly! Sizdi ulttyq mereke – Respýblika kúnimen shyn júrekten quttyqtaimyn», – delingen Resei basshysynyń hatynda.
Vladimir Pýtin Qazaqstannyń ekonomika men áleýmettik saladaǵy jetistikteri halyqaralyq deńgeide moiyndalǵanyn atap ótken. Sondai-aq elimizdiń halyqaralyq isterde mańyzdy ári syndarly ról atqaratynyn jáne álemdik arenada laiyqty bedelge ie ekenin jetkizgen.
Resei Prezidenti eki el arasyndaǵy qarym-qatynastyń strategiialyq áriptestik pen odaqtastyq rýhynda damyp kele jatqanyn atap ótti. Onyń aitýynsha, Máskeý men Astana TMD, Eýraziialyq ekonomikalyq odaq, Ujymdyq qaýipsizdik týraly shart uiymy, Shanhai yntymaqtastyq uiymy jáne basqa da kópjaqty qurylymdar aiasynda kúsh-jigerin úilestirip keledi.
Pýtin aldaǵy ýaqytta da Resei men Qazaqstan arasyndaǵy ózara tiimdi bailanystardy barlyq baǵyt boiynsha nyǵaitýǵa nietti ekenin bildirdi. Onyń sózinshe, bul eki el halyqtarynyń igiligine, sondai-aq Eýraziia keńistigindegi qaýipsizdik pen turaqtylyqty nyǵaitýǵa qyzmet etedi.
Resei basshysy Qasym-Jomart Toqaevqa zor densaýlyq pen tabys, al Qazaqstan halqyna amandyq pen órkendeý tiledi.
