Prezident Qasym-Jomart Toqaev qazaqstandyqtardy 25 qazan – Respýblika kúnimen quttyqtady. Memleket basshysy ulttyq merekeniń tarihi mańyzyna toqtalyp, elimizdiń táýelsizdik jyldaryndaǵy jetistikteri men aldaǵy strategiialyq mindetterin atap ótti, dep habarlaidy dalanews.kz.
Prezident óz quttyqtaýynda Respýblika kúni qazaq memlekettiliginiń qaita jańǵyrýyn bildiretin erekshe mereke ekenin atap ótti. Onyń aitýynsha, Qazaqstan egemendik jyldarynda túrli syn-qaterlerdi eńserip, halyqaralyq qoǵamdastyqtaǵy ornyn nyǵaitty.
"Barshańyzdy ulttyq merekemiz – Respýblika kúnimen quttyqtaimyn! Bul – myńjyldyqtardan tamyr tartatyn qazaq memlekettiliginiń qaita jańǵyrýyn aishyqtaityn qasterli mereke. Biz egemendik jyldarynda talai syn-qaterdi eńserip, biik belesterdi baǵyndyrdyq. Osylaisha, elimizdiń irgesin bekemdep, eldigimizdiń tuǵyryn nyǵaita tústik. Qazaqstan Táýelsizdiktiń 35 jyldyq mejesine ekonomikasy qýatty, qoǵamy jasampaz, kúlli álem qaýymdastyǵy qurmetpen qaraityn, bedeli zor ári yqpaldy orta derjava, órkenietti memleket retinde jetip otyr.Biyl biz ult jylnamasynyń jańa paraǵyn ashyp, tarihi órleý dáýirine betburys jasadyq. Aldymyzda turǵan maqsat – barshaǵa aiqyn. Biz myqty memlekettik institýttary men sapaly adam kapitaly bar, jahandyq básekege qabiletti, ozyq, damyǵan, jasampaz, zaiyrly el bolýymyz kerek", – dedi Prezident.
Qasym-Jomart Toqaev Qazaqstannyń ozyq tehnologiialar men innovatsiialardy damytýǵa, jasandy intellekt múmkindikterin tiimdi paidalanýǵa kiriskenin aitty.
"Osy oraida, Konstitýtsiiamyzdyń zańdy kúshine enýi halyqaralyq qoǵamdastyqtyń nazaryn aýdarǵan, tarihi mán-maǵynasy asa erekshe oqiǵa boldy. Konstitýtsiia memlekettik basqarý júiesiniń tolyǵymen jańarýyna, elimizdiń saiasi, ekonomikalyq, mádeni jáne áleýmettik salalarynda túbegeili ózgerister jasaýǵa úlken serpin berdi. Biz Konstitýtsiiada aiqyndalǵan qundylyqtarǵa súiene otyryp, strategiialyq baǵdarymyzdan ainymai, mindetti túrde alǵa qadam basamyz, aldymyzǵa qoiǵan barlyq mindetterdi júzege asyramyz. Qazir biz ozyq tehnologiialar men innovatsiialardy júieli damytyp, jasandy intellektiniń múmkindikterin el igiligine jarata bastadyq. Zamanaýi óndiris oryndaryn ashyp, infraqurylymdy jańǵyrtyp, mektepter, aýrýhanalar jáne basqa da áleýmettik nysandardy salyp jatyrmyz. Halqymyzdyń igiligi úshin kóptegen jobany iske asyrý josparymyzda bar", – dedi Memleket basshysy.
