Atyraý oblysynda tórt adamdy óltirgeni úshin ómir boiyna bas bostandyǵynan aiyrylǵan Sultan Sársemálievtiń jazasyn qai mekemede óteitini belgili boldy, dep habarlaidy dalanews.kz.
"Aq Jaiyq" basylymynyń málimetinshe, ol 19 qyrkúiekte arnaiy qaraýylmen Jezqazǵandaǵy №62 qylmystyq-atqarý júiesi mekemesine jetkizilgen.
Buǵan deiin Sársemáliev Qostanai oblysyndaǵy ómir boiyna sottalǵandar jazasyn óteitin «Qara búrkit» mekemesine jiberilýi múmkin degen aqparat taraǵan edi. Alaida keiin Jezqazǵandaǵy №62 koloniianyń da ómir boiyna bas bostandyǵynan aiyrylǵan sottalǵandardy ustaýǵa beiimdelip jatqany belgili boldy.
Basylym dereginshe, №62 mekeme buǵan deiin aralas qaýipsizdik mekemesi bolǵan. 2026 jyly onyń beiini ózgerip, ómir boiyna sottalǵandarǵa arnalǵan qosymsha oryndar ázirleý jumystary bastalǵan. Osy maqsatta ǵimarattar jóndelip, qaita jabdyqtalyp jatyr.
Sársemálievke qatysty úkim 14 shildede shyqqan. Sot ony ómir boiyna bas bostandyǵynan aiyryp, jazasyn tótenshe qaýipsizdik mekemesinde óteýge úkim etken. Ol sot sheshimine shaǵym túsirmegen, sondyqtan úkim 3 qyrkúiekte zańdy kúshine engen.
Qazirgi ýaqytta №62 mekemede naqty qansha sottalǵan otyrǵany jáne onda taǵy kimderdiń jetkizilgeni jariialanbaidy. Qylmystyq-atqarý júiesi departamenti mundai málimetti qyzmettik aqparatqa jatqyzǵan.
