Atyraý oblysynda Halyqty áleýmettik qorǵaý salasyndaǵy retteý jáne baqylaý komitetiniń departament basshysy Baýyrjan Asainovtyń máiiti páterinen tabylǵan, dep habarlaidy dalanews.kz.
«Aq Jaiyq» basylymnyń málimetinshe, Asainovtyń denesi 18 qazanda ózi turǵan páterden tabylǵan. Onyń qaitys bolǵanyn áriptesteri de rastaǵan. Vedomstvonyń resmi paraqshasynda marqumǵa arnalǵan qazanama jariialanyp, jaqyndaryna kóńil aitylǵan.
Basqa da derekkózder sheneýniktiń denesi tabylǵanǵa deiin páterde shamamen eki apta jatýy múmkin ekenin jazdy. Sondai-aq BAQ marqum men onyń aǵasy arasynda janjal bolýy yqtimal degen aqparat taratqan. Alaida bul málimetter resmi túrde rastalmaǵan.
Basylymnyń jazýynsha, oqiǵaǵa deiin aǵaiyndylar birge alkogoldik ishimdik iship, keiin janjaldasqan bolýy múmkin. Derekkózder marqumnyń aǵasy ony soǵyp, páterden ketip qalǵan degen boljamdy da alǵa tartqan. Degenmen janjaldyń bolǵany, oǵan kimniń qatysqany jáne onyń ólimge qatysy bar-joǵy ázirge resmi túrde anyqtalǵan joq.
Qazirgi ýaqytta Baýyrjan Asainovtyń ólim sebebi týraly resmi aqparat jariialanbaǵan. Oqiǵanyń mán-jaiy jóninde quqyq qorǵaý organdarynyń túsiniktemesi qajet.
Baýyrjan Asainov 2023 jylǵy 4 qańtardan bastap Atyraý oblysy boiynsha áleýmettik qorǵaý salasyndaǵy retteý jáne baqylaý departamentin basqarǵan. Buǵan deiin prokýratýra organdarynda, Memlekettik qyzmet isteri agenttiginde, Indýstriia jáne jańa tehnologiialar ministrliginde jumys istegen. Sondai-aq Densaýlyq saqtaý ministrliginiń Sanitariialyq-epidemiologiialyq baqylaý komitetindegi ishki qaýipsizdik basqarmasyn basqarǵan.
