Qazaqstannyń Tuńǵysh prezidentiniń nemeresi Nuráli Áliev ájesi Sara Nazarbaeva negizin qalaǵan «Ózin-ózi taný» baǵytyn qaita damytýǵa nietti ekenin málimdedi, dep habarlaidy dalanews.kz.
Ol suhbattarynyń birinde jas urpaqqa rýhani jáne adamgershilik tárbie berýdiń mańyzyna toqtalyp, bul bastamany qaita jandandyrý qajet dep esepteitinin aitqan.
«Ózin-ózi taný» páni Qazaqstan mektepteriniń mindetti oqý baǵdarlamasyna 2010–2011 oqý jylynda engizilgen. Sara Nazarbaevanyń bastamasymen ázirlengen kýrs oqýshylardyń boiynda meiirimdilik, izgilik, jaýapkershilik, adamgershilik jáne ishki úilesimdilik sekildi qasietterdi qalyptastyrýǵa baǵyttaldy.
2022 jyly Oqý-aǵartý ministrligi atalǵan pándi mindetti sabaqtar qatarynan alyp tastap, fakýltativtik kýrs formatyna aýystyrǵan bolatyn.
Nuráli Áliev balalar men jastardyń rýhani tárbiesine kóbirek kóńil bólip, adamgershilik qundylyqtardy nasihattaityn jobalardy damytýǵa múddeli ekenin jetkizdi.
Onyń pikirinshe, mundai bastamalar jas urpaqtyń tulǵalyq qalyptasýyna, qoǵam aldyndaǵy jaýapkershiligin sezinýine jáne izgi qasietterdi boiyna sińirýine oń yqpal etedi.
