Almatyda jańa SU LAB Street zerthanalar kóshesi ashyldy. Bul – qala turǵyndarynyń bárine arnalǵan biregei tamasha keńistik, dep habarlaidy dalanews.kz.
Munda mektep oqýshylary kelip, túrli buiymdar jasap kórýge, zamanaýi jabdyqtarmen jumys isteýge jáne kásibi praktikalyq baǵdarlaýdan ótýge múmkindik alady. Bul olarǵa joǵary oqý ornyna túspei turyp-aq ózderine qai salanyń jaqyn ekenin anyqtaýǵa kómektesedi. Balalar men ata-analar munda kelip, barlyq oqý sabaqtaryna tolyǵymen tegin qatysa alady. Álemdik tájiribede mundai nysandardyń balamasy joqtyń qasy. Almaty – sondai nysandy qala turǵyndarynyń igiligine jaratýǵa usynyp otyrǵan álemdegi alǵashqy qala, munda ǵylym men qoldanystaǵy zerthanalar kópshilikke qoljetimdi, ári tolyqtai ashyq.
Sátbaev ýniversiteti injenerlik zerthanalar men sheberhanalardy, tájiribelik óndiris oryndaryn biriktiretin biryńǵai alań – SU Labs Street keńistigin kópshilikke tanystyrdy. Bul jerde ǵalymdar, stýdentter, ónertapqyshtar men kásipkerler jańa tehnologiialyq ónimder ázirlei alady. Ári munda ónimdi jobalaýdan bastap, alǵashqy úlgisin daiyndaý, ony synaqtan ótkizip, jetildirý jáne óndiriske engizýge daiyndaýǵa deiingi tolyq jumys tsikli júzege asyrylady.
Jańa infraqurylym ǵylymi ázirlemelerdi óndiriske engizý úderisin jedeldetýge jáne ýniversitettiń ónerkásip oryndarymen yntymaqtastyq bailanysyn keńeitýge múmkindik beredi.
SU Labs Street alańy injenerlik jobalaý, 3D-basyp shyǵarý, materialdardy mehanikalyq túrde óńdeý, elektronikany qurastyrý jáne tájiribelik óndiris múmkindikterin biriktiredi. Ázirleýshiler buiymdardyń tsifrlyq modelderin jasap, bólshekteri men korpýstaryn daiyndaidy, qurylǵylardy qurastyryp, olardy synaqtan ótkize alady, sóitip konstrýktsiialaryn jetildire alady. Qajet bolǵan jaǵdaida bir jobaǵa birneshe zerthananyń mamandary tartylady.
Otandyq injenerlik tehnologiialar men óndiristerdi damytý memlekettik saiasattyń basym baǵyttarynyń biri bolyp tabylady. Memleket basshysy Qasym-Jomart Toqaev Qazaqstan halqyna jasaǵan Joldaýynda iri infraqurylymdyq jobalardy qazaqstandyq kásiporyndardyń ónimderimen qamtamasyz etý qajettigine erekshe toqtaldy:
«Atap aitqanda, biz iri infraqurylymdyq jobalardy iske asyrý úshin qajetti otandyq qurylys materialdaryn, metall konstrýktsiialaryn jáne injenerlik jabdyqtardy óndirýdi qamtamasyz etýimiz kerek».
Qoldanbaly ǵylymdy damytý, ǵylymi zertteýlerdi kommertsiialandyrý jáne ýniversitetterdiń ónerkásippen bailanysyn nyǵaitý Qazaqstan Respýblikasy Ǵylym jáne joǵary bilim ministrligi qyzmetiniń basym baǵyttaryna jatady. SU Labs Street otandyq injenerlik jabdyqtardy ázirleýge, ǵylymi jetistikterdi óndiriske engizýge jáne óz tehnologiialaryn jasai alatyn bilikti mamandardy daiarlaýǵa qajetti jaǵdai jasaidy.
«Ideiadan bastap, jumys isteitin prototipke deiingi joldy qysqartý úshin, biz zerthanalar men sheberhanalardy bir-birine jaqyn ornalastyrdyq. Kásiporyndar bizge naqty tehnologiialyq tapsyrmalar bere alady, al ǵalymdar men stýdentter jedel túrde onyń sheshimderin ázirlep, synaqtar júrgizedi jáne tájiribelik úlgilerin jasai alady», – dep atap ótti Sátbaev ýniversitetiniń rektory Meiram Begentaev.
Jańa infraqurylymnyń negizgi nysandarynyń biri – Mechanical Prototyping and Pilot Production ortalyǵy. Munda injenerlik ideialar tájiribelik úlgilerge ainalyp, keiin shaǵyndaý óndiristi jolǵa qoiýǵa múmkindik beredi. Al FabLab MIT zerthanasynda tsifrlyq jobalaý jáne bólshekterdi daiyndaý tehnologiialary qoljetimdi bolsa, RTEL zerthanalary elektrondyq qurylǵylardy qurastyryp, olardyń jumys sapasyn tekserýge múmkindik beredi.
SU Labs Street keńistiginde sondai-aq ushqyshsyz ushý apparattaryn ázirleýge, jańa materialdardy zertteýge jáne óndiristik mindetterdi sheshýge qajetti jaǵdai jasalǵan. Taý-ken metallýrgiiasy baǵyty boiynsha jumys isteitin zerthanalar kenniń quramyn zertteýge, baǵaly komponentterdi bólip alý tehnologiialaryn ázirleýge jáne burǵylaý quraldaryn synaqtan ótkizýge múmkindik beredi. Al EcoHub ortalyǵynda paidalanylǵan plastik qaita óńdelip, odan jańa ónimder jasalady – munda sándik interer buiymdarynan bastap, jihazǵa deiin jasaýǵa bolady. Injenerlik ázirlemeni daiyn ónimge ainaldyrýdyń taǵy bir mysaly – QuatPoint zariadtaý stantsiialary. Búginde Qazaqstanda 400-den astam osyndai stantsiia óndirilip, ornatylǵan. Bul joba injenerlik jobalaý, elektronika, baǵdarlamalyq qamtamasyz etý jáne ónerkásiptik óndiris baǵyttaryn biriktiredi.
30 qazan kúni buqaralyq aqparat quraldarynyń ókilderi SU Labs Street alańynyń múmkindikterimen tanysty. Jýrnalister zerthanalar men sheberhanalardy aralap, jabdyqtardy, tehnologiialyq ázirlemelerdi jáne Sátbaev ýniversiteti ǵalymdarynyń zertteý nátijelerin tamashalady.
SU Labs Street jobasyn iske asyrý ýniversitette injenerlik ázirlemelerdiń tolyq tsiklin – ǵylymi ideiadan bastap, ónerkásipte qoldanýǵa daiyn ónim alý úderisin jeteldetýge baǵyttalǵan. Joba ǵylymi zertteýlerdi kommertsiialandyrý, tehnologiialyq kásipkerlikti damytý jáne Qazaqstan ekonomikasyna qajetti ázirlemelerdi jasai alatyn injenerlerdi daiarlaý múmkindikterin keńeitedi.
