Qazaqstan Pin-Up býkmekerlik keńsesiniń ielerine halyqaralyq izdeý jariialady. Bul týraly jýrnalist Mihail Kozachkov óziniń Telegram-arnasynda jazdy, dep habarlaidy dalanews.kz.
Onyń aitýynsha, Bas prokýratýranyń Quqyqtyq statistika jáne arnaiy esepke alý organdary portalynda Dmitrii Pýnin men Marina Ilinaǵa qatysty izdeý kartochkalary paida bolǵan. Qarjylyq monitoring agenttiginiń málimetinshe, olar Qazaqstan aýmaǵynda zańsyz onlain-kazino jumysyn uiymdastyrǵan negizgi tulǵalar retinde kúdikke ilingen.
Jýrnalist bul sheshimdi bir jyldan astam ýaqytqa sozylǵan tergeýdiń zańdy jalǵasy dep baǵalady.
"2025 jyldyń basynda The Gambler Telegram-arnasy Qazaqstanda resmi tirkelgen Pin-Up býkmekerlik keńsesi oiynshylardy elimizde tyiym salynǵan onlain-kazino saittaryna baǵyttaityny týraly kólemdi zertteý jariialaǵan edi", – dep jazdy Mihail Kozachkov.
Keiin bul aqparatqa Qarjylyq monitoring agenttigi nazar aýdaryp, zańsyz oiyn biznesine qatysty qylmystyq is qozǵaǵan. Tergeý aiasynda ekinshi deńgeili bankterdiń birqatar qyzmetkeri ustaldy. Tergeý nusqasyna sáikes, olar shetel azamattaryna zańsyz jolmen túsken qarajatty shyǵarýǵa kómektesken.
Kozachkovtyń jazýynsha, atalǵan platformalarda qazaqstandyqtar joǵaltqan qarjynyń jalpy kólemi shamamen 100 milliard teńgege jetken.
"Keiin bul shemany Qazaqstanǵa arnaiy kelgen Ýkraina azamattary Dmitrii Drýjinskii men Marina Levkovich-Ginzbýrg uiymdastyrǵany belgili boldy. Olarǵa qazaqstandyq IT mamandary men qarjygerler kómektesken. Qazir birneshe adam qamaýǵa alyndy, al Ýkraina azamattaryna izdeý jariialandy", – dedi jýrnalist.
Osy ýaqytqa deiin tergeýdiń zańsyz biznestiń negizgi paida alýshylaryna jete me degen saýal ashyq qalyp kelgen. Kozachkovtyń málimetinshe, Pin-Up kompaniiasy Kiprde turatyn Resei azamaty Dmitrii Pýnin men onyń jubaiy Marina Ilinaǵa tiesili.
"Búgin Bas prokýratýranyń Quqyqtyq statistika jáne arnaiy esepke alý organdary portalynyń bazasynda Pýnin men Ilinaǵa qatysty kartochkalar paida boldy. Ekeýi de halyqaralyq izdeýge jariialanǵan", – dep jazdy ol.
Jýrnalist bul jaǵdaidy Qazaqstan tájiribesinde buryn-sońdy bolmaǵan oqiǵa dep baǵalady.
"Meniń bilýimshe, Qazaqstannyń iri halyqaralyq gembling platformalary ielerin izdeýge jariialaýy alǵash ret bolyp otyr. Endi oqiǵanyń ári qarai qalai órbitini qyzyq", – dep túiindedi Mihail Kozachkov.
