Qyzylordada jol apatynan bes ailyq sábiinen aiyrylǵan áieldiń esin jiǵany habarlandy. Buǵan deiin ol aýyr jaraqattarmen jansaqtaý bólimine jetkizilgen bolatyn. Al anasy men balasyn qaǵyp, oqiǵa ornynan qashyp ketken júrgizýshige izdeý jariialanǵan, dep habarlaidy dalanews.kz.
Qaiǵyly oqiǵa 13 qazanda saǵat 17:10 shamasynda Qyzylorda qalasyndaǵy Qultekenov kóshesinde bolǵan.
Aldyn ala málimet boiynsha, Mitsubishi Lancer avtokóliginiń júrgizýshisi bes ailyq sábiimen kele jatqan áieldi qaǵyp, kómek kórsetpesten oqiǵa ornynan ketip qalǵan. Jol apatynan anasy men balasy aýyr jaraqat alyp, aýrýhanaǵa jetkizildi. Alaida dárigerler sábidiń ómirin saqtap qala almady.
Sábiinen aiyrylǵan anasy aýyr jaraqat alǵan
Buǵan deiin jariialanǵan málimetterge sáikes, jol apatynan zardap shekken áieldiń bas súiegi, qabyrǵalary, buǵanasy, jambasy men tobyǵy synǵan. Sondai-aq onyń ókpesi zaqymdanyp, jaraqattyq shok alǵany habarlandy.
Dárigerler áieldiń jaǵdaiyn aýyr dep baǵalaǵan. Al oqiǵadan keiingi alǵashqy kúnderi onyń es-tússiz jatqany belgili bolǵan.
Keiinirek zardap shekken áieldiń esin jiǵany týraly aqparat tarady. Degenmen onyń qazirgi densaýlyq jaǵdaiyna jáne emdeý barysyna qatysty jańartylǵan resmi meditsinalyq qorytyndy jariialanǵan joq.
Júrgizýshini eki apta boiy izdegen
Qyzylorda oblystyq politsiia departamenti adam ólimine ákelgen jol-kólik oqiǵasy jáne oqiǵa ornyn tastap ketý derekteri boiynsha qylmystyq ister qozǵaǵan.
Politsiia kúdiktiniń jeke basy anyqtalǵanyn habarlady.
27 qazanda jariialanǵan aqparatqa sáikes, oqiǵadan eki apta ótkenine qaramastan, júrgizýshi áli ustala qoimaǵan. Quqyq qorǵaý organdary oǵan izdeý jariialap, sot sanktsiiasymen syrttai qamaýǵa alý sharasyn qabyldaǵan.
Politsiianyń málimetinshe, kúdiktiniń júrgen jerin anyqtaýǵa barlyq qajetti kúsh jumyldyrylǵan. Tergeý barysy erekshe baqylaýǵa alynǵan.
