Қызылордада жол апатынан бес айлық сәбиінен айырылған әйелдің есін жиғаны хабарланды. Бұған дейін ол ауыр жарақаттармен жансақтау бөліміне жеткізілген болатын. Ал анасы мен баласын қағып, оқиға орнынан қашып кеткен жүргізушіге іздеу жарияланған, деп хабарлайды dalanews.kz.
Қайғылы оқиға 13 қазанда сағат 17:10 шамасында Қызылорда қаласындағы Құлтекенов көшесінде болған.
Алдын ала мәлімет бойынша, Mitsubishi Lancer автокөлігінің жүргізушісі бес айлық сәбиімен келе жатқан әйелді қағып, көмек көрсетпестен оқиға орнынан кетіп қалған. Жол апатынан анасы мен баласы ауыр жарақат алып, ауруханаға жеткізілді. Алайда дәрігерлер сәбидің өмірін сақтап қала алмады.
Сәбиінен айырылған анасы ауыр жарақат алған
Бұған дейін жарияланған мәліметтерге сәйкес, жол апатынан зардап шеккен әйелдің бас сүйегі, қабырғалары, бұғанасы, жамбасы мен тобығы сынған. Сондай-ақ оның өкпесі зақымданып, жарақаттық шок алғаны хабарланды.
Дәрігерлер әйелдің жағдайын ауыр деп бағалаған. Ал оқиғадан кейінгі алғашқы күндері оның ес-түссіз жатқаны белгілі болған.
Кейінірек зардап шеккен әйелдің есін жиғаны туралы ақпарат тарады. Дегенмен оның қазіргі денсаулық жағдайына және емдеу барысына қатысты жаңартылған ресми медициналық қорытынды жарияланған жоқ.
Жүргізушіні екі апта бойы іздеген
Қызылорда облыстық полиция департаменті адам өліміне әкелген жол-көлік оқиғасы және оқиға орнын тастап кету деректері бойынша қылмыстық істер қозғаған.
Полиция күдіктінің жеке басы анықталғанын хабарлады.
27 қазанда жарияланған ақпаратқа сәйкес, оқиғадан екі апта өткеніне қарамастан, жүргізуші әлі ұстала қоймаған. Құқық қорғау органдары оған іздеу жариялап, сот санкциясымен сырттай қамауға алу шарасын қабылдаған.
Полицияның мәліметінше, күдіктінің жүрген жерін анықтауға барлық қажетті күш жұмылдырылған. Тергеу барысы ерекше бақылауға алынған.
