Respýblika kúni qarsańynda oblys ákimi Berik Ýáli qalalar men aýdandardyń mektepterine jańa avtobýstardyń kiltin saltanatty túrde tabystaý rásimine qatysty, dep habarlaidy dalanews.kz.
Semei qalasyndaǵy Qaraǵaily yqsham aýdanynda ótken saltanatty rásimde aimaq basshysy jinalǵandardy Respýblika kúnimen quttyqtap, balalardyń sapaly bilim alýyna jaǵdai jasaý men olardyń qaýipsizdigin qamtamasyz etý mańyzdy mindettiń biri ekenin atap ótti.
«Memleket basshysy Qasym-Jomart Toqaevtyń bastamasymen elimizde kitap oqityn ult qalyptastyrýǵa, jas urpaqtyń bilimge degen qushtarlyǵyn arttyrýǵa erekshe mán berilip keledi. Osy baǵytta mektep oqýshylarynyń sapaly bilim alýyna jaǵdai jasaý, olardyń kitap oqýǵa degen qyzyǵýshylyǵyn arttyrý jáne oi-órisin keńeitý – ortaq mindetimiz. Sondyqtan balalarymyzdyń qaýipsizdigin qamtamasyz etip qana qoimai, olardyń jan-jaqty damýyna, bilimdi de sanaly azamat bolyp qalyptasýyna barlyq jaǵdai jasaýymyz qajet. Aýyldyq jerler men shalǵai eldi mekenderde turatyn balalardyń mektepke qaýipsiz ári qolaily qatynaýy úshin biz lizing arqyly 50 mektep avtobýsyn satyp aldyq. Búgin oblysymyzdyń qalalary men aýdandaryna jańa, zamanaýi ári qaýipsiz 10 mektep avtobýsynyń kiltin tabystaimyz. Qalǵan 40-yn jeltoqsan aiynda beretin bolamyz. Bizdiń maqsatymyz – aýyl balasy men qala balasynyń bilim alý múmkindikterin teńestirý. Árbir bala qai jerde tursa da, sapaly bilimge qol jetkizýi tiis», – dedi Berik Ýáli.
Muǵalimder men ata-analar jańa avtobýstarǵa óz rizashylyqtaryn jetkizdi.
«Búgin biz úshin óte qýanyshty kún. Buǵan deiin, ásirese, qys mezgilinde, dizel otynymen júretin avtobýstarmen oqýshylardy tasymaldaý kezinde birqatar qiyndyqtar týyndaityn. Endi jańa avtobýstardyń berilýi bul máseleni sheshýge úlken septigin tigizedi. Bul – mektep ujymy úshin ǵana emes, ata-analar men Saryarqa aýylynyń turǵyndary úshin de zor qýanysh. Aýyl turǵyndary da óz rizashylyqtaryn bildirip jatyr. Jańa avtobýstar oqýshylardyń qaýipsiz ári jaily qatynaýyna múmkindik beredi dep senemiz», – dedi Jarma aýdany T.Kóbdikov atyndaǵy orta mektebiniń muǵalimi Qalamqas Ajimbetova.
Jańa avtobýstar otandyq óndiristen shyqqan, balalardy tasymaldaýǵa arnalǵan «PAZ-32053-70» markaly shaǵyn klasty kólikter. Ár avtobýsta 23 jolaýshyǵa arnalǵan oryn bar. Kólikter balalardyń qaýipsizdigin qamtamasyz etýge qajetti jabdyqtarmen qamtylǵan. Atap aitqanda, oryndyqtar tórt núkteli qaýipsizdik beldikterimen jabdyqtalǵan. Sondai-aq, avtobýstarda pnevmatikalyq tejeý júiesi, jolaýshylar salonyn jylytý júiesi, balalardyń minýi men túsýin baqylaýǵa múmkindik beretin jaryqtandyrylǵan esik oiyqtary qarastyrylǵan.
Budan bólek, avtobýstarǵa eki dári qobdishasy, eki órt sóndirgish, apattyq belgi, GPS júiesi jáne beinetirkeý quraldary ornatylǵan. Kólikter sary túske boialyp, aldyńǵy, artqy jáne búiir bólikterine balalardy tasymaldaýǵa qatysty arnaiy belgiler men jazýlar ornalastyrylǵan. Júrgizýshige arnalǵan belgi berý batyrmasy da qarastyrylǵan. Tehnikalyq sipattamalarǵa sáikes, avtobýstardyń uzyndyǵy – 6,9 metr, eni – 2,5 metr, biiktigi – 2,96 metr.
Jańa avtobýstar Semei qalasymen qatar, Aiagóz, Úrjar, Aqsýat, Besqaraǵai, Jarma, Kókpekti, Borodýliha jáne basqa da aýdandardyń mektepterine beriledi. Bul aýyldyq jerler men shalǵai eldi mekenderdegi oqýshylardyń mektepke qatynaýyn jeńildetip, olardyń qaýipsiz ári qolaily jaǵdaida bilim alýyna septigin tigizedi.
