Astanada kúres túrlerinen álem chempionatyna bilet satyp alýǵa kelgen kórermender qiyndyqqa tap boldy. Jankúierlerdiń aitýynsha, «Barys Arena» sport kesheninde biletter bir ǵana kassa arqyly satylyp, uzyn-sonar kezek paida bolǵan, dep habarlaidy dalanews.kz.
Áleýmettik jelilerde taraǵan habarlamaǵa sáikes, kórermender biletti onlain satyp ala almai, kassaǵa júginýge májbúr bolǵan. Adamnyń kóptiginen biletterdi rásimdeý qiyndap, jankúierler uzaq ýaqyt kútken.
Alaida onlain satylymnyń naqty qandai sebeppen qoljetimsiz bolǵany ázirge belgisiz. Uiymdastyrýshylardyń bul jaǵdaiǵa qatysty resmi túsiniktemesi de tabylǵan joq.
Astana ákimdiginiń 13 qazanda jariialaǵan aqparatyna sáikes, kúres túrlerinen álem chempionatyna biletterdi wrestling.kz saitynan nemese «Barys Arena» kassalarynan satyp alýǵa bolady. Kassa kún saiyn saǵat 12:00-den 20:00-ge deiin jumys isteitini habarlanǵan.
Grek-rim, erkin jáne áielder kúresinen álem chempionaty 24 qazan men 1 qarasha aralyǵynda ótedi. Jarysqa álemniń 135 elinen 900-den astam sportshy qatysady dep josparlanǵan.
Jankúierlerdiń pikirinshe, halyqaralyq deńgeidegi jarys kezinde bilet satý jumysyn uiymdastyrýǵa erekshe nazar aýdarý qajet. Ásirese kórermender aǵyny kóp bolǵanda, biletti onlain satyp alý múmkindigi men kassalardyń jumysyn úilestirý mańyzdy.
Dala News redaktsiiasy bilet satý máselesine qatysty uiymdastyrýshylardyń túsiniktemesin kútedi.
