Frantsiia biligi 17 qazandaǵy jappai tártipsizdikterden keiin qaýipsizdik sharalaryn kúsheitip, 24 qazanda ótetin narazylyq aktsiialary kezinde 70 myń politsiia qyzmetkerin jumyldyrýdy josparlap otyr, dep habarlaidy dalanews.kz.
Reuters agenttiginiń 23 qazandaǵy málimetinshe, operatsiiaǵa arnaiy bólimsheler, sonyń ishinde RAID jáne GIGN qyzmetkerleri qatysady. Qoǵamdyq tártipti baqylaý úshin atqa mingen politsiia, tikushaqtar, drondar, brondy kólikter men sý atqyshtar da paidalanylýy múmkin.
Frantsiia prezidenti Emmanýel Makron buǵan deiin barlaý qyzmetteriniń 17 qazandaǵy narazylyqtardyń aýqymyn aldyn ala baǵalai almaǵanyn moiyndady. Ol tártipsizdikke qatysqan adamdardy jaýapqa tartý qajettigin aityp, bilikke qarsy áreketterge qatań shara qoldanatynyn málimdedi.
Aldaǵy senbige josparlanǵan sherýlerge de shekteý qoiyldy. Parijde profsoiýz uiymdastyrǵan aktsiiaǵa ruqsat berilip, stýdentter uiymy men «Sary keýdesheliler» qozǵalysynyń ótinishteri qabyldanbady. Lion qalasynda senbige josparlanǵan barlyq demonstratsiiaǵa tyiym salyndy. Birqatar óńirde komendanttyq saǵat ta saqtalyp otyr. 17 qazandaǵy narazylyqtar kezinde beibit sherýler jappai tártipsizdikke ulasyp, birneshe qalada dúkender tonalyp, ǵimarattar men kólikter órteldi. Reuters málimetinshe, tártipsizdikterden keiin shamamen 3 myń saýda nysany tonalǵan.
Narazylyqtardyń negizgi sebepteriniń qatarynda ómir súrý qunynyń ósýi, janarmai baǵasynyń qymbattaýy jáne memlekettik qyzmetterdiń sapasyna qatysty narazylyq bar. Oǵan stýdentter, jumysshylar jáne kásipodaq ókilderi qatysqan.
Frantsiia úkimeti tártipsizdikterden zardap shekken kásipkerlerge de qoldaý kórsetýdi josparlap otyr. Onyń ishinde ýaqytsha jumyssyzdyq tólemderin memleket esebinen óteý, salyq tólemderin keiinge qaldyrý jáne qarjylai kómek berý sharalary qarastyrylǵan.
Aldaǵy demalys kúnderi bilik jańa qaqtyǵystardyń aldyn alýǵa tyrysady. Sonymen birge sherýlerge qoiylǵan shekteýler azamattardyń beibit jinalý quqyǵyna qatysty pikirtalastardy kúsheitip otyr.
