Respýblika kúnine arnalǵan saltanatty jiyn S. Seifýllin atyndaǵy Qaraǵandy oblystyq akademiialyq qazaq drama teatrynda ótti.
Oblys ákimi Ermaǵanbet Bólekpaev óńir turǵyndaryn ulttyq merekemen quttyqtap, Qazaqstan Prezidentiniń atynan memlekettik nagradalardy tabys etti. Eldiń órkendeýine eleýli úles qosqan eńbek ardagerleri, kenshiler, kásipkerler, aýyl sharýashylyǵy salasynyń qyzmetkerleri, ustazdar, dárigerler, sportshylar jáne ózge de sala ókilderi marapatqa ie boldy.
Biylǵy Respýblika kúniniń orny erekshe. Ulttyq mereke el Táýelsizdiginiń 35 jyldyǵy atap ótiletin kezeńmen tuspa-tus kelip otyr. Bul aitýly data Qazaqstannyń qalyptasý jolyn aishyqtap, el damýynyń jańa belesine bastar mańyzdy tarihi mejege ainaldy.
Quttyqtaý sózinde Ermaǵanbet Bólekpaev óńirdiń áleýmettik-ekonomikalyq damýyndaǵy jetistikterge toqtalyp, atqarylyp jatqan jumystardyń basty maqsaty turǵyndardyń turmys sapasyn arttyrý ekenin atap ótti.
— Óńir damýynyń basty nátijesi — adamdardyń laiyqty tabys taýyp, sapaly bilim men meditsinalyq kómekke qol jetkizýi, bala tárbielep, týǵan jerinde bolashaǵyna senimmen qaraýy. Jyl basynan beri oblysta toǵyz myńnan astam jumys orny ashyldy. 2030 jylǵa deiin 17 myńǵa jýyq jumys ornyn qurýǵa múmkindik beretin 100-den astam investitsiialyq jobany júzege asyrý josparlanyp otyr. Bul bastamalar sizderdi týǵan jerde eńbek etýge, óz isińizdi ashyp, bala ósirýge yntalandyrady dep senemin. Óńirimizdiń órkendeýine adal eńbegimen úles qosyp júrgen barshańyzǵa alǵys aitamyn, - dedi Ermaǵanbet Bólekpaev.
Qazaqstan Respýblikasy Prezidentiniń Jarlyǵymen eldiń áleýmettik-ekonomikalyq jáne mádeni-rýhani damýyna qosqan eleýli úlesi, halyqtar arasyndaǵy dostyq pen yntymaqtastyqty nyǵaitýǵa sińirgen eńbegi jáne belsendi qoǵamdyq qyzmeti úshin oblystyń 40 turǵyny memlekettik nagradalarmen marapattaldy. Olarǵa «Parasat», «Qurmet», III dárejeli «Eńbek Dańqy» ordenderi, sondai-aq «Eren eńbegi úshin» jáne «Shapaǵat» medaldary tabystaldy.
Qaraǵandy oblysynyń eki turǵyny memlekettik nagradalaryn Aqordada Memleket basshysy Qasym-Jomart Toqaevtyń qolynan aldy.
«Baqyt» bóbekjai-baqshasynyń qazaq tili pániniń muǵalimi Baian Muqusheva «Shapaǵat» medalimen marapattalsa, №3 arnaiy mektep-internatynyń defektology Natalia Seifýlinaǵa «Qazaqstannyń eńbek sińirgen ustazy» qurmetti ataǵy berildi.
Qali Baijanov atyndaǵy Qaraǵandy kontserttik birlestiginiń «Arqa sazy» folklorlyq ansambliniń kórkemdik jetekshisi Baiqara Sádýaqasov «Parasat» ordenimen marapattaldy.
— Qurmanǵazy atyndaǵy Almaty memlekettik konservatoriiasyn támamdaǵan kezden beri mádeniet salasynda eńbek etip kele jatqanyma 40 jyl boldy. Sodan beri bar ǵumyrymdy ónerge arnap, ulttyq mýzykamyzdy saqtaý men ony keńinen nasihattaýdy ómirlik muratym dep bildim. Qazaqtyń bai mýzykalyq murasyn tyńdarmanǵa tanytyp, dástúr sabaqtastyǵyn keiingi urpaqqa jetkizip júrgen «Arqa sazy» ujymynyń quramynda eńbek etý men úshin zor mártebe. Bul marapat — meniń eńbegime ǵana berilgen baǵa emes, óner jolyn ómirine ózek etken barsha jannyń qajyrly eńbegine kórsetilgen qurmet. Eńbegimizdi joǵary baǵalaǵany úshin shynaiy alǵysymdy bildiremin, - dedi Baiqara Sádýaqasov.
«Qurmet» ordenine «Shahtinskteploenergo» JShS direktory Altai Eljasov, Nura aýdanynyń kitaphana salasynyń ardageri Súleimen Jumabekov, S. Seifýllin atyndaǵy oblystyq akademiialyq qazaq drama teatrynyń ártisi Shaiza Núkina, Kúzembaev atyndaǵy shahtanyń direktory Sergei Potemkin jáne Á. Saǵynov atyndaǵy Qaraǵandy tehnikalyq ýniversitetiniń professory Savet Saǵyntaev ie boldy.
III dárejeli «Eńbek Dańqy» ordenimen Nura aýdanyndaǵy sharýa qojalyǵynyń direktory Táýbajan Aitileýov pen «Aqnar PF» qus fabrikasynyń tehnology Igor Kivrin marapattaldy.
— Qus fabrikasynda eńbek etip kele jatqanyma 30 jylǵa jýyqtady. Qazir tehnolog retinde broiler balapandaryn ósirýdiń barlyq kezeńin baqylap, tutynýshylarǵa tek sapaly ónimniń jetkizilýin qadaǵalaimyn. Ujymymyz uiymshyl ári eńbekqor. Barshańyzǵa amandyq, beibitshilik pen jaqsylyq tileimin, - dedi Igor Kivrin.
«Eren eńbegi úshin» medaline ie bolǵandardyń qatarynda «Botaqara sý qojalyǵy» KMK ýchaskesiniń sheberi Qanat Aimaqov, «Tas Komir Trade» JShS bas injeneri Nadejda Vinnikova, Qarqaraly aýdandyq aýrýhanasynyń dárigeri Baian Jumageldinova, «Vostochnaia» ortalyq baiytý fabrikasynyń apparatshysy Tatiana Kraminskaia, Shet aýdanyndaǵy «Nova Tsink» kásipornynyń elektr slesari Bolatbek Qosanov, eńbek ardagerleri Iýrii Piniaev pen Nadejda Plotnikova jáne basqa da azamattar bar.
Al Qaraǵandy qalasyndaǵy №3 kópbeiindi aýrýhananyń bólim meńgerýshisi Erǵali Shaýenov «Shapaǵat» medalimen marapattaldy.
Onyń aitýynsha, bul meditsina salasyndaǵy 30 jylǵy jumysyndaǵy alǵashqy joǵary marapaty. Sondai-aq muny jalpy onkohirýrgter ujymy eńbeginiń elenýi jáne joǵary baǵalanýy dep biletinin jetkizdi.
Budan bólek, úsh memlekettik qyzmetshige Memlekettik qyzmet isteri agenttiginiń «Memlekettik qyzmet ardageri» vedomstvolyq tósbelgisi tabystaldy.
Saltanatty jiyn oblystyń ónerpazdary men shyǵarmashylyq ujymdary qatysqan merekelik kontsertpen túiindeldi.
