Jeńil tabysqa qyzyǵý qandai quqyqtyq saldarǵa ákelýi múmkin? I. Jansúgirov atyndaǵy Jetisý ýniversitetiniń stýdentteri osy saýalǵa «Shekara» atty teatrlandyrylǵan úlgilik sot protsesi arqyly jaýap berdi. Quqyqtyq qoiylym esirtki qylmysynyń zardaptaryn kórsetip, jastarǵa zań aldyndaǵy jaýapkershilikti naqty sot protsesiniń úlgisinde túsindirýdi kózdedi, dep habarlaidy dalanews.kz.
Quqyq jáne ekonomika fakýltetiniń stýdentteri sahnalaǵan qoiylymda esirtkini belgilengen oryndarǵa jasyryn jetkizý qylmysy negizge alyndy. Sot protsesi arqyly qylmystyq áreketterge tartylýdyń saldary, zań talaptaryn buzǵany úshin jaýapkershilik jáne ádil sot tóreliginiń mańyzy ashyp kórsetildi.
Bolashaq zańgerler sýdia, prokýror, qorǵaýshy jáne ózge de protseske qatysýshylardyń rólderin somdap, teoriialyq bilimderin tájiribemen ushtastyrdy. Qoiylymda zań aldyndaǵy teńdik pen kinásizdik prezýmptsiiasy siiaqty negizgi quqyqtyq qaǵidattarǵa basymdyq berildi.
Is-sharaǵa Taldyqorǵan qalasynyń jalpy bilim beretin mektepterinen 400 oqýshy jáne ýniversitettiń 1-kýrsynda oqyp jatqan 300 stýdent qatysyp, jalpy 700 jasty qamtydy. Sonymen qatar, Jetisý oblysynyń quqyq qorǵaý organdarynyń ókilderi men fakýltettiń jumys berýshi seriktesteri tamashalady.
Teatrlanǵan qoiylymdy sahnalaýǵa Jetisý oblysy prokýratýrasy, «Jańarý» sybailas jemqorlyqqa qarsy jalpyulttyq qozǵalys» respýblikalyq qoǵamdyq birlestigi qoldaý kórsetti. Shara sońynda jastar arasynda quqyqtyq saýattylyqty arttyrý taqyrybynda ótken oblystyq esse baiqaýynyń qorytyndysy shyǵarylyp, jeńimpazdar marapattaldy. Olardy Jetisý oblysy prokýrorynyń orynbasary Birlik Izbasarov jáne ýniversitet rektory Ermek Bóribaev quttyqtap, gramota men baǵaly syilyq tabystady.
