Prezident Respýblika kúni qarsańynda bir top azamatty memlekettik nagradalarmen marapattaý týraly Jarlyqqa qol qoidy. Marapat ieleriniń qatarynda eńbek ardagerleri, óndiris jumysshylary, pedagogter, ǵalymdar, meditsina qyzmetkerleri, kásipkerler men mádeniet qairatkerleri bar, dep habarlaidy dalanews.kz.
Ulttyq mereke qarsańynda eldiń áleýmettik-ekonomikalyq jáne mádeni-rýhani damýyna, halyqtar arasyndaǵy dostyq pen yntymaqtastyqty nyǵaitýǵa eleýli úles qosqan azamattar memlekettik nagradalarmen marapattaldy.
Resmi málimetke sáikes, 129 eńbek ardageri, ónerkásip, kólik, qurylys, aýyl sharýashylyǵy jáne basqa da salalardyń 473 jumysshysy memlekettik nagradalarǵa ie boldy. Sondai-aq shaǵyn jáne orta biznestiń 200-den astam ókili, 150-den asa pedagog pen ǵalym, 120-ǵa jýyq meditsina qyzmetkeri marapattaldy.
Memlekettik nagradalar kimderge berildi?
«Qazaqstannyń Eńbek Eri» ataǵy óndiriske sińirgen eńbegi úshin «Kazakhmys Smelting» JShS Jezqazǵan mys balqytý zaýytynyń balqytýshysy Á. Dospanovqa berildi.
«Otan» ordenimen kompozitor, mádeniet jáne óner qairatkeri, «Mýzart» tobynyń tanymal bolýyna erekshe úles qosqan A. Qorazbaev marapattaldy.
I dárejeli «Barys» ordeni «TNS-group» kontserni» zańdy tulǵalar birlestiginiń prezidenti T. Jumaǵulov pen akter N. Yqtymbaevqa tabystaldy. II dárejeli «Barys» ordenine bilim salasynyń ardageri E. Mámbetqaziev pen alpinizm federatsiiasynyń vitse-prezidenti Q. Ýáliev laiyq dep tanyldy.
Eldiń damýyna úles qosqan ǵalymdar, mádeniet qairatkerleri jáne óndiris ókilderi «Parasat» ordenimen marapattaldy. Al túrli salada eńbek etip júrgen azamattarǵa «Qurmet» jáne «Eńbek Dańqy» ordenderi berildi.
Qoǵamdyq kelisim men bilim salasynyń ókilderi de marapattaldy
Qoǵamdyq kelisimdi jáne ultaralyq qatynastardy nyǵaitýǵa qosqan úlesi úshin birqatar azamat «El birligi» ordenine ie boldy. Olardyń qatarynda etnomádeni birlestikterdiń ókilderi men bilim berý salasynyń qyzmetkerleri bar.
Sonymen qatar mádeniet qairatkerlerine «Qazaqstannyń eńbek sińirgen qairatkeri», pedagogterge «Qazaqstannyń eńbek sińirgen ustazy», óner ókilderine «Qazaqstannyń halyq ártisi», meditsina qyzmetkerlerine «Qazaqstannyń eńbek sińirgen dárigeri» qurmetti ataqtary berildi.
Áskeri jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýge jáne ulttyq qaýipsizdikti nyǵaitýǵa qosqan úlesi úshin áskeri qyzmetshiler men quqyq qorǵaý organdarynyń ókilderi de memlekettik nagradalarmen marapattaldy.
Osylaisha, Respýblika kúni qarsańynda óndiris pen aýyl sharýashylyǵynan bastap bilim, ǵylym, meditsina, mádeniet jáne qaýipsizdik salalaryna deiin el damýyna úles qosyp júrgen azamattardyń eńbegi atap ótildi.
