Qazaqstan 2025 jylǵy Network Readiness Index (NRI) halyqaralyq reitinginde 127 eldiń ishinde 65-orynǵa ie boldy. Osylaisha, reitingke engen Ortalyq Aziia memleketteri arasynda úzdik nátije kórsetti, dep habarlaidy dalanews.kz.
Ortalyq Aziia elderiniń reitingi:
- Qazaqstan – 65-oryn;
- Ózbekstan – 72-oryn;
- Qyrǵyzstan – 90-oryn.
Qazaqstannyń tsifrlyq damý salasyndaǵy jetistikteri birneshe baǵytta baiqalady. Atap aitqanda, elimiz mektepterdiń internetke qoljetimdiligi boiynsha álemde birinshi orynǵa shyqty.
Qazaqstannyń negizgi kórsetkishteri:
- mektepterdiń internetke qoljetimdiligi boiynsha – 1-oryn;
- memlekettik onlain qyzmetterdi damytý boiynsha – 10-oryn;
- mobildi bailanys tarifteriniń qoljetimdiligi boiynsha – 20-oryn;
- memlekettik organdardyń derektermen jumys isteý múmkindigi boiynsha – 25-oryn.
Elektrondy memlekettik qyzmetterdiń damýy biznes úshin de mańyzdy. Tsifrlandyrý qujat rásimdeýge, memlekettik qyzmetterdi alýǵa jáne memlekettik organdarmen ózara árekettesýge ketetin ýaqytty qysqartýǵa múmkindik beredi. Al mektepterdiń internetke qoljetimdiligi jastardyń tsifrlyq daǵdylaryn damytýǵa jáne bolashaq mamandardy daiarlaýǵa negiz qalaidy.
Network Readiness Index neni baǵalaidy?
Network Readiness Index halyqaralyq reitingi tórt negizgi baǵytty qamtidy. Olar – tehnologiialyq infraqurylym, adami kapital, memlekettik basqarý, sondai-aq tsifrlandyrýdyń ekonomika men qoǵamǵa yqpaly. Qazaqstan úshin qol jetkizgen nátijelermen shektelmei, tsifrlyq múmkindikterdi ekonomikalyq ósimdi jedeldetýge paidalaný da mańyzdy.
Elektrondy memlekettik qyzmetterdi, tsifrlyq tólemderdi, jasandy intellektini jáne telekommýnikatsiialyq infraqurylymdy damytý eńbek ónimdiligin arttyrýǵa, ákimshilik shyǵyndardy azaitýǵa jáne jańa tsifrlyq biznestiń paida bolýyna jaǵdai jasaidy.
Qazaqstandy alda ne kútip tur?
Qazaqstan memlekettik basqarýdy tsifrlandyrý jáne tehnologiialardyń qoljetimdiligi boiynsha eleýli nátijelerge qol jetkizdi. Endigi mindet – osy jetistikterdi biznestiń ónimdiligin arttyrýǵa, IT-qyzmetter eksportyn damytýǵa jáne joǵary tehnologiialy jańa salalardy qalyptastyrýǵa paidalaný.
Óitkeni tsifrlandyrý – azamattarǵa qolaily jaǵdai jasaýdyń ǵana emes, ekonomikanyń damýyn jedeldetýdiń de mańyzdy quraly.
