Reuters saýalnamasyna qatysqan sarapshylardyń basym bóligi Qazaqstan Ulttyq banki bazalyq mólsherlemeni jyldyq 16,25%-dan 16%-ǵa deiin tómendetedi dep kútedi, dep habarlaidy dalanews.kz.
Qazaqstan Ulttyq banki bazalyq mólsherlemeni jyldyq 16,25%-dan 16%-ǵa deiin tómendetýi múmkin. Mundai boljamdy Reuters agenttigi saýalnama júrgizgen sarapshylar bildirdi.
Saýalnamaǵa qatysqan 12 sarapshynyń segizi bazalyq mólsherleme 16%-ǵa deiin tómendeidi dep esepteidi. Taǵy eki sarapshy onyń 15,75%-ǵa deiin túsetinin boljasa, qalǵan ekeýi mólsherleme qazirgi 16,25% deńgeiinde saqtalady degen pikirde.
Qyrkúiek aiynda Ulttyq bank bazalyq mólsherlemeni 16,75%-dan 16,25%-ǵa deiin tómendetken. Retteýshi mólsherleme boiynsha dálizdi pliýs-minýs 1 paiyzdyq tarmaq deńgeiinde belgiledi.
Sol kezde Ulttyq bank proinfliatsiialyq faktorlar men táýekelderdiń kúsheiýi 2027 jylǵa arnalǵan boljamdardyń qaita qaralýyna áser etkenin habarlaǵan. Retteýshiniń baǵalaýynsha, mundai jaǵdaida bazalyq mólsherlemeni odan ári tómendetý múmkindigi shekteýli.
2026 jylǵy qyrkúiekte Qazaqstandaǵy ailyq infliatsiia 0,6% boldy. Bul kórsetkish tamyz aiyndaǵy deńgeimen birdei. Al jyldyq infliatsiia tamyzdaǵy 9,8%-dan qyrkúiekte 9,3%-ǵa deiin baiaýlaǵan.
Reuters saýalnamasyna qatysqan sarapshylardyń basym bóligi aqsha-kredit saiasaty komiteti bazalyq mólsherlemeni jyl sońyna deiin 16% deńgeiinde saqtaidy dep kútedi. Sonymen qatar olardyń pikirinshe, 2027 jyldyń birinshi toqsanynda mólsherlemeni odan ári tómendetý múmkindigi shekteýli bolýy yqtimal.
