Qazaqstanda keibir mamandyqtar boiynsha bakalavrdy úsh jylda aiaqtaýǵa múmkindik berilgenimen, oqý aqysy tómendemeidi. Sebebi stýdent burynǵydai 240, al jekelegen bilim berý baǵdarlamalarynda keminde 300 akademiialyq kreditti tolyq meńgerýge tiis. Premer-ministr Oljas Bektenov depýtattyq saýalǵa bergen jaýabynda jańa formattyń ereksheligin túsindirdi, dep habarlaidy dalanews.kz.
Onyń aitýynsha, oqý quny stýdenttiń ýniversitette qansha jyl oqitynyna emes, bilim berý baǵdarlamasyndaǵy akademiialyq kreditterdiń jalpy kólemine qarai esepteledi.
"Oqý merzimi qysqarǵan jaǵdaida bilim berý baǵdarlamasynyń kólemi ózgermeidi. Stýdent belgilengen akademiialyq kreditterdi qysqa merzim ishinde igeredi", – dedi Úkimet basshysy.
Demek, tórt jylǵa eseptelgen oqý baǵdarlamasy úsh jylǵa jinaqtalady. Sonyń saldarynan sabaq kestesi tyǵyzdalyp, stýdenttiń oqý júktemesi artady.
Ýniversitetterdiń shyǵyny da aitarlyqtai azaimaidy. Oqytýshylar sol kólemdegi sabaqty qysqa ýaqytta ótkizýge tiis, al oqý ǵimarattary, zerthanalar men ózge de infraqurylym burynǵydai paidalanylady. Osyǵan bailanysty úsh jyldyq jedeldetilgen format oqý aqysyn tómendetýge negiz bolmaidy.
Qazir elimizde 16 myńnan astam stýdent trimestrlik júiemen bilim alyp júr. Mundai tásil Astana IT University, ál-Farabi atyndaǵy QazUÝ, L.N. Gýmilev atyndaǵy EUÝ jáne basqa da joǵary oqý oryndarynda qoldanylady. Úsh jyldyq baǵdarlamalar negizinen IT, kiberqaýipsizdik, jasandy intellekt, biznes-taldaý jáne marketing baǵyttaryn qamtidy.
Alaida bul formatty barlyq mamandyqqa engizý múmkin emes. Meditsina, veterinariia, sondai-aq pedagogikalyq jáne injenerlik baǵyttardyń birqatary uzaq tájiribelik daiyndyqty qajet etedi.
Úsh jyldyq bakalavriattyń tiimdiligi 2027 jyly jan-jaqty baǵalanbaq. Ǵylym jáne joǵary bilim ministrligi Eńbek ministrligimen, «Atameken» palatasymen jáne biznes ókilderimen birlesip, stýdentterdi daiarlaýǵa jumsalatyn shyǵyndy, túlekterdiń jumysqa ornalasýy men tabysyn, sondai-aq jumys berýshilerdiń pikirin zertteidi.
