Qostanai oblysynyń turǵyny turǵyn úige zańsyz kirip, qarý-jaraq pen oq-dári urlaǵany úshin tórt jylǵa bas bostandyǵynan aiyryldy, dep habarlaidy dalanews.kz.
Qostanai oblysynda qarý-jaraq pen oq-dári urlaǵan er adam tórt jylǵa bas bostandyǵynan aiyryldy. Bul týraly Qostanai oblysynyń Beiimbet Mailin aýdandyq soty habarlady.
Sot qylmystyq quqyq buzýshylyqtardyń jiyntyǵy boiynsha aiyptalýshyny eń joǵary qaýipsizdik deńgeiindegi qylmystyq-atqarý júiesi mekemesinde tórt jylǵa bas bostandyǵynan aiyrýǵa úkim shyǵarǵan. Sottalýshynyń kinásin moiyndaýy, qylmystyń ashylýyna belsendi túrde kómektesýi jáne shyn júrekten ókinýi jaýaptylyǵy men jazasyn jeńildetetin mán-jailar retinde eskerilgen. Sonymen qatar onyń áreketteri qylmystardyń qaitalanýy retinde tanylǵan.
Sot anyqtaǵandai, 2026 jylǵy 14 tamyzǵa qaraǵan túni er adam Beiimbet Mailin aýdanynyń Novoilinovka aýylyndaǵy turǵyn úige ashyq turǵan tereze jeldetkishi arqyly zańsyz kirgen.
Úidiń ishinen ol eki ańshylyq pyshaqty, patrondarǵa arnalǵan beldikti, myltyq qapshyǵyn, kamýfliaj tústi riýkzakty, patron salynǵan keýdesheni, «Vepr-308-Sýper» markaly ańshylyq karabinin, optikalyq kózdeýishti, myltyqqa arnalǵan dúmdi jáne oq-dárilerdi jasyryn túrde urlaǵan.
Sottyń málimetinshe, keltirilgen materialdyq shyǵynnyń jalpy somasy 1 mln 157 myń teńgeni quraǵan.
Memlekettik aiyptaýshy sottalýshyny alty jylǵa bas bostandyǵynan aiyrýdy suraǵan. Alaida sot istiń mán-jailaryn jáne jaýaptylyqty jeńildetetin faktorlardy eskerip, tórt jyl merzimge bas bostandyǵynan aiyrý jazasyn taǵaiyndaǵan.
Sottalýshy taǵylǵan aiypty tolyq moiyndap, jasaǵan isine ókinetinin bildirgen.
Úkim zańdy kúshine engen joq.
