Jetisý oblys qurylǵannan beri bilim berý nysandarynyń 41,8 % jańǵyrtyldy. Biyl 5 jańa mektep paidalanýǵa berilip, 2 bilim oshaǵy kúrdeli jóndeýden ótti. Solardyń biri - daryndy balalarǵa arnalǵan «Bilim-Innovatsiia» mamandandyrylǵan litsei-internatynyń 300 oryndy zamanaýi jańa oqý ǵimaraty Respýblika kúni qarsańynda paidalanýǵa berildi. Taldyqorǵan qalasynda ornalasqan bul bilim ordasynyń ashylý saltanatyna oblys ákimi Beibit Isabaev, ardager ustazdar, mektep ujymy, oqýshylar men ata-analar qatysty, dep habarlaidy dalanews.kz.
Óńir basshysy kópshilikti aitýly jańalyqpen quttyqtady:
- Sońǵy úsh jylda jetisýlyq oqýshylar halyqaralyq olimpiadalar men ziiatkerlik konkýrstarda 73 medal ielendi. Atalǵan marapattardyń 27-si, iaǵni 40% tikelei osy litsei shákirtterine tiecili. Bul aitýly kórsetkish – litseide qalyptasqan sapaly bilim berý dástúri men ustazdardyń kásibi eńbeginiń aiqyn kórinisi. Búgingi oqýshy – erteńgi el tiregi. Sondyqtan biz jastardyń tereń bilim alýyna, jeke tulǵa retinde jan-jaqty damýyna qajetti jaǵdai jasaýdy jalǵastyramyz, - dedi B.Isabaev.
Mekteptiń lentasy qiylyp, jinalǵan kópshilik ǵimarattyń ishki múmkindikterimen tanysty. Oblys basshysy geografiia, tarih, qazaq tili, robottehnika kabinetterin aralap kórdi. Sol siiaqty foede qoiylǵan litsei oqýshylary jetistikteriniń kórmesimen tanysty. Osy jerde halyqaralyq pán olimpiadalarynyń jeńimpazdarymen tildesti. «Memleket basshysy parasatty, oqityn, izdenimpaz, tehnologiiany, jasandy intellektti meńgergen, zerdeli urpaq qalyptastyrýǵa barlyq jaǵdai jasaý týraly mindet qoiyp otyr. Soǵan sai el kóleminde, sonyń ishinde oblysta da úlken jobalar iske asyrylyp jatyr. Sizder de osy úrdisten qalmai, respýblikadaǵy eń bedeldi, óziniń tarihy bar mektep litseiinde jaqsy oqyp, úlken jetistikterge jete berińder, úlken azamat bolyp ósińder», - dedi oblys basshysy.
Osy kúni litsei oqýshylaryna «Kitap oqityn ult» jobasyna engizilgen kitaptar tizimindegi 60 jinaq syiǵa tartyldy.
Mektep direktory Aibek Ashirmetovtiń aitýynsha, «Taldyqorǵan daryndy balalarǵa arnalǵan «Bilim-Innovatsiia» mamandandyrylǵan mektep-litseii 1993 jyly qurylǵan.
- Osy ýaqyttan beri bilim mekemesin 1,5 myńǵa jýyq túlek bitirip shyqty. Ótken jyly bitirgen 48 oqýshynyń bári joǵary oqý oryndaryna oqýǵa tústin. Munda oqytý qazaq, orys, aǵylshyn, túrik tilderinde júredi. Búgingi ashylyp otyrǵan jańa ǵimaratta 37 kabinet bar, sonyń ishinde lingvistikalyq kabinet jáne zerthanalar jabdyqtalǵan. Bul oqýshylardyń jetistikterin eselei túsýge úlken yqpal etedi, - deidi A.Ashirmetov.
Mektepte 100-den astam adam jumys istese, sonyń 37-si – pedagog. Solardyń biri jas maman Miras Medetuly eleýli qýanyshqa orai pikir bildirdi:
- Men osy bilim mekemesine biylǵy oqý jylynda jas maman bolyp kelip otyrmyn. Biologiia páninen sabaq beremin. Bul mektepte jaratalystaný pánderi aǵylshyn tilinde ótedi, sondyqtan biologiia páni de aǵylshyn tilinde júredi. Ózim Óskemen qalasyndaǵy «Bilim-innovatsiia» mektep-litseiin bitirdim, keiin I. Jansúgirov atyndaǵy Jetisý ýniversitetinde oqydym. Alǵashqy eńbek jolymdy osy litseiden bastap jatqanyma qýanyshtymyn, - dedi ol.
Jańa oqý ǵimaratynyń ashylǵanyna ata-analar da riza.
- Búgin biz úshin erekshe kún. «Bilim-innovatsiia» mektebiniń jańa ǵimaraty ashyldy. Meniń ulym Jaidar Eskendir bastaýyshta qaladaǵy Abai atyndaǵy №1 mektepte, 5-6 synyptardy № 20 litseide oqydy, sol alǵan sapaly biliminiń arqasynda 7 synypta osy mektepke qabyldandy. Qazir 11 synypta, bul óte jaýapty kezeń. Osy jylda jańa oqý korpýsy qoldanysqa berilgenine qýanyshtymyn. Ishin aralap kórdik ádemi, jaily, keń, úlken ǵimarat. Jańa korpýstyń qurylysyna atsalysqan barsha azamattarǵa ata-analar atynan alǵys aitamyz, - dedi Shynar Ahmadieva.
Atap ótsek, mektep-litseide 266 oqýshy oqidy. Sonyń biri - Ádilet Bekmolda.
- Men 7 synyptan beri osy mektepte oqimyn. Aldyńǵy jyly litsei prezidenti boldym. Litsei ómirine belsene qatysamyn. Respýblikalyq olimpiadalar men ǵylym jobalar baiqaýynyń úsh márte júldegerimin. Búgin litsei tarihynyń jańa belesi bastaldy dep bilemiz. Otyz jyldan astam ýaqytta qalyptasqan bilim men tárbie qundylyqtary jańa ǵimaratta jalǵasyn tabady. Meniń oiymsha, bizden keiingi ósip kele jatqan inilerimiz úshin bul ǵimarat keremet múmkindikter beredi. Bolashaqta osy jerden alǵan bilimimdi eldiń igiligine arnaimyn dep oilaimyn, - deidi Ádilet Bekmolda.
Eske salsaq, bul «Bilim-Innovatsiia» mamandandyrylǵan litsei-internatynyń oqý ǵimaratynyń qurylysy 2025 jyly mamyrda bastalǵan bolatyn.
