Aqmola oblysynyń Zerendi aýdanyndaǵy Aidarly aýylynda Másip Batyrhanuly atyndaǵy halyqaralyq «Qansonar-2026» qusbegilik týrniri ótti. Dástúrli dodaǵa Qazaqstannyń on oblysynan jáne shetelderden kelgen qusbegiler qatysyp, ulttyq saiatshylyq ónerindegi sheberlikterin kórsetti, dep habarlaidy dalanews.kz.
Biylǵy jarysqa halyqaralyq dárejedegi sport sheberleri, Aziia chempionattarynyń júldegerleri jáne ulttyq sport túrlerinen joǵary nátijelerge qol jetkizgen tájiribeli sportshylar jinaldy.
Aqmola oblysynyń dene shynyqtyrý jáne sport basqarmasynyń basshysy Ardaq Tólendinniń aitýynsha, jarys joǵary deńgeide uiymdastyrylyp, qatysýshylar arasyndaǵy báseke tartysty ótken. Onyń sózinshe, tóreshilerdiń jumysyna qatysty qatysýshylar tarapynan narazylyq bolmaǵan.
Aqmola oblysynyń namysyn Erlan Kenjetaev pen Igor Kochevnikov bastaǵan qusbegiler qorǵady. Biyl óńir úshin taǵy bir jaǵymdy jańalyq boldy: jarysqa alǵash ret Aqmola oblysynan qyz bala qatysty. Ol qusbegilik ónerdi eki jyldan beri meńgerip keledi. Sonymen qatar ulttyq sportqa qyzyǵýshylyq tanytqan tórt jas sportshy da óz múmkindikterin synady. Olardyń ishindegi eń jasy – Aqmola oblysynan kelgen 14 jastaǵy qatysýshy.
Ardaq Tólendinniń málimetinshe, búginde óńirdegi on sport mektebinde ulttyq sport túrleri júieli túrde damytylyp keledi. Ásirese Zerendi jáne Býrabai aýdandarynyń sportshylary respýblikalyq jarystarda turaqty túrde júldeli oryndarǵa ie bolyp, Qazaqstan ulttyq quramasy sapynda halyqaralyq dodalarǵa qatysyp júr.
Týrnirdiń negizgi maqsaty – qazaqtyń ulttyq sport túrlerin keńinen nasihattaý, ata-babadan amanat bolyp jetken qusbegilik ónerdi saqtaý jáne ony halyqaralyq deńgeide tanytý. Osyǵan orai jarys ótetin aýmaqta qazaq halqynyń salt-dástúri men mádenietin dáripteitin etnoaýyl uiymdastyryldy. Munda sheteldik qonaqtar ulttyq mádenietpen jaqynyraq tanysyp, asyq atý jáne sadaq atý boiynsha kórsetilimderdi tamashalai aldy.
Biylǵy týrnirge Túrkiiadan kelgen Mýtlý da qatysty. Ol Qazaqstanǵa altynshy ret kelip otyr. Qusbeginiń aitýynsha, qazaq halqyna jáne ulttyq saiatshylyq ónerine degen yqylasy ony elimizge qaita-qaita oralýǵa jeteleidi.
«Men Qazaqstandy da, qazaq halqyn da jaqsy kóremin. Qusbegilik – ata-babadan qalǵan erekshe óner. Bul jarysty men jai ǵana báseke dep qabyldamaimyn. Men úshin bul – dostarymmen, baýyrlarymmen qaýyshatyn úlken kezdesý. Eń bastysy – dostyq pen baýyrlastyq», – deidi Mýtlý.
Ol Túrkiiada qusbegilik jarystaryn uiymdastyrýda birqatar qiyndyq bar ekenin atap ótti. Soǵan qaramastan, bolashaqta óz elinde de osyndai halyqaralyq týrnirler ótkizýge nietti ekenin jetkizdi. Sondai-aq qazaqstandyq qusbegilerdi Túrkiiaǵa shaqyryp, tájiribe almasýǵa múddeli ekenin aitty.
Halyqaralyq «Qansonar-2026» týrniri ulttyq murany dáripteýmen qatar, ár eldiń ókilderi arasyndaǵy dostyq qarym-qatynasty nyǵaityp, tájiribe almasýǵa jol ashty. Mundai sharalar qusbegilik ónerdiń urpaqtan urpaqqa jalǵasýyna jáne qazaq mádenietiniń halyqaralyq deńgeide tanylýyna yqpal etedi.
Týrnir qorytyndysy boiynsha búrkit, itelgi jáne qarshyǵa baǵyttarynda úzdikter anyqtaldy. Uiymdastyrýshylardyń málimetinshe, jeńimpazdar men júldegerlerge aqshalai sertifikattar jáne arnaiy syilyqtar tabystaldy.
Qarshyǵa baǵyty boiynsha:
1. Birinshi oryn – Berikbolsyn Jalǵasuly (Jambyl oblysy).
2. Ekinshi oryn – Erasyl Serkbekuly (Astana qalasy).
3. Úshinshi oryn – Aqjol Karchiganov (Resei).
Búrkitshiler saiysy boiynsha:
1. Birinshi oryn – Shyńǵys Ýálihan (Aqmola oblysy).
2. Ekinshi oryn – Bairaq Tastanbek (Aqtóbe oblysy).
3. Úshinshi oryn – Jandarbek Saǵidýllaev (Almaty qalasy).
Itelgi baǵyty boiynsha:
1. Birinshi oryn – Temiráli Tólegenuly (Qaraǵandy oblysy).
2. Ekinshi oryn – Erlan Kenjetaev (Aqmola oblysy).
3. Úshinshi oryn – Mýtlý Kyzylbýga (Túrkiia).
