Qazaqstandyq jýrnalist ári qoǵam belsendisi Arman Shoraev Ýkrainadaǵy soǵysqa Resei armiiasy quramynda qatysqan Qazaqstan azamattaryn qatań jazalaý kerek dep esepteidi. Ol bul týraly Facebook-tegi paraqshasynda jazdy, dep habarlaidy dalanews.kz.
Shoraevtyń pikirinshe, Ýkraina aýmaǵynda basqynshy ásker quramynda bolǵan qazaqstandyqtardy elge qaitarýǵa kúsh salýdyń ornyna, olardy zań aiasynda jaýapqa tartý qajet.
Ol soǵysqa qatysqan azamattardyń ózderin aldap ketkeni týraly ýájderin de synǵa alǵan. Sonymen qatar belsendi soǵys júrip jatqan elge jumys isteý úshin barýdyń táýekeline toqtalyp, balalaryn mundai qaýipke jibergen ata-analardyń jaýapkershiligi týraly másele kótergen.
Qazaqstan zańnamasynda ne aitylǵan?
Qazaqstanda shet memlekettiń aýmaǵyndaǵy qarýly qaqtyǵystarǵa qatysqany úshin qylmystyq jaýapkershilik qarastyrylǵan.
Qylmystyq kodekstiń 172-babyna sáikes, jaldamalylyq belgileri bolmaǵan jaǵdaida shet memlekettiń aýmaǵyndaǵy qarýly qaqtyǵysqa nemese áskeri is-qimyldarǵa qasaqana zańsyz qatysqan azamat bes jyldan toǵyz jylǵa deiin bas bostandyǵynan aiyrylýy múmkin.
Al Qylmystyq kodekstiń 170-babynda jaldamalylyq úshin jaýapkershilik kózdelgen. Jaza qylmystyń mán-jaiy men aýyrlyǵyna bailanysty belgilenedi.
Buǵan deiin Qazaqstan azamattarynyń Resei áskeri quramynda Ýkrainadaǵy soǵysqa qatysqany úshin sottalǵan jaǵdailary tirkelgen. Máselen, 2025 jylǵy tamyzda Atyraý oblysynyń soty Resei áskeri quramynda Donetsk oblysyndaǵy urys qimyldaryna qatysqan qazaqstandyqty bes jylǵa bas bostandyǵynan aiyrǵanyn rastaǵan.
Sonymen qatar azamattardyń shetelde áskeri kelisimshartqa qandai jaǵdaida qol qoiǵany árbir is boiynsha jeke anyqtalýǵa tiis. Qazaqstannyń quqyq qorǵaý organdary qylmystyq jaýapkershilik máselesin qoldanystaǵy zańnamaǵa sáikes sheshedi.
