Búgin oblys ákimi Murat Ergeshbaevtyń qatysýymen Syr óńirindegi egin jinaý naýqanynyń aiaqtalýyna orai «Aqmarjan» agromádeni festivali aiasynda «Altyn kúz – 2026» saltanatty sharasy ótti.
Onda aýyl sharýashylyǵy salasyndaǵy jetistikter tanystyrylyp, jergilikti óndirýshilerdiń ónimderi qoiylǵan kórme uiymdastyryldy.
Aimaq basshysy el yrysyn eseleýge úles qosqan dala eńbekkerlerine alǵysyn bildirdi.
«Memleket basshysy Qasym-Jomart Kemeluly óz Joldaýynda agroónerkásip keshenin jańǵyrtý, ozyq tehnologiialardy engizý, ónimderdi tereń óńdeý máselesin basty mindet retinde aiqyndady.
Aýyl sharýashylyǵy – oblys ekonomikasynyń jetekshi salalarynyń biri. Biyl salany memlekettik qoldaýǵa 37 mlrd. teńge bólinip, bul kórsetkish ótken jylmen salystyrǵanda bir jarym ese artty. Jyldyń 9 aiynda aýyl sharýashylyǵynda 178 mlrd. teńgeniń ónimi óndirildi. «Keń dala-2» nesie berý jobasynyń arqasynda mashina-traktor parki jańartylýda. Salaǵa tartylǵan investitsiia kólemi 25 mlrd. teńgege, ósim 37 paiyzǵa jetti.
Búgingi jetistikterimizdiń túp-tamyry – aǵa býyn ókilderi men ardagerlerimizdiń qajyrly eńbeginde. Ómir boiy týǵan jerdiń órkendeýine súbeli úles qosyp, adal eńbegimen oblystyń áleýetin kótergen barsha eńbek ardagerlerine sheksiz alǵysymdy bildiremin! Sizderdiń ómirlik tájiribelerińiz ben ónegeli joldaryńyz – búgingi jas býyn úshin baǵa jetpes mektep», – dedi Murat Nálqojauly.
Merekede jyl qorytyndysymen óńirdiń agroónerkásip kesheni salasynda úzdik jetistikterge jetken eńbek ozattary marapattalady.
Sonymen qatar salany damytýǵa eleýli úles qosqan azamattar Aýyl sharýashylyǵy ministrliginiń «Eńbek ardageri» jáne «Aýyl sharýashylyǵy salasynyń úzdigi» tósbelgilerin ielendi. Aýyl sharýashylyǵy ministriniń Qurmet gramotasy tabystalyp, ozat eńbekkerlerge toǵyz avtokólik berildi.
«Úzdik aýdan» nominatsiiasyna Qarmaqshy aýdany, «Ozat aýdan» nominatsiiasyna egin sharýashylyǵy boiynsha Jalaǵash aýdany, mal sharýashylyǵy boiynsha Jańaqorǵan aýdany laiyq dep tanyldy.
Biyl óńirdegi aýyl sharýashylyǵy daqyldarynyń egis kólemi 7 100 gektarǵa artyp, 193 700 gektarǵa jetken. Sońǵy jyldary sý tapshylyǵyna bailanysty egisti ártaraptandyrýdyń mańyzy artýda. Sýdy kóp qajet etetin kúrish egisi 10 900 gektarǵa ońtailandyrylyp, ornyna tirshilik nárin az tutynatyn, rentabeldiligi, eksporttyq áleýeti joǵary daqyldar egisi 20 myń gektarǵa jýyq ulǵaityldy. Dán júgeri daqylynyń kólemi 5 ese artty.
Memleket basshysynyń tapsyrmasyna sáikes, sý resýrstaryn tiimdi paidalaný jáne sý únemdeý tehnologiialaryn keńinen engizýde júieli jumys júrgizilip keledi. Ótken jyly sý únemdeý tehnologiialaryn paidalaný arqyly 8 100 gektar jerge egin egilse, biyl bul kórsetkish 14 200 gektarǵa jetkizildi.
Osy jylǵa 30 mlrd teńgeniń 8 investitsiialyq jobasy josparlanǵan. Búginde 3 joba júzege asyrylsa, qalǵan 5 jobany jyl sońyna deiin aiaqtaý kózdelip otyr.
Óńirde sheteldik investorlardyń qatysýymen iri investitsiialyq jobalar qolǵa alyndy. Respýblika kúni qarsańynda jylyjai kesheniniń qurylysy bastaldy. Bul óńirdiń aýyl sharýashylyǵy salasyna investitsiia tartýǵa, óndiris kólemin arttyrýǵa múmkindik beredi.
