Memleketke opasyzdyq jasaǵany úshin 18 jylǵa bas bostandyǵynan aiyrylǵan Ulttyq qaýipsizdik komitetiniń burynǵy tóraǵasy Kárim Másimovtiń jazasyn qai jerde ótep jatqany áli belgisiz. Ishki ister ministrligi eks-sheneýniktiń túrmedegi ómirine qatysty aqparatty jariialaýdan bas tartty, dep habarlaidy dalanews.kz.
Qylmystyq-atqarý júiesi komitetine Kárim Másimovtiń qamaýdaǵy jaǵdaiyna qatysty birqatar saýal joldanǵan. Atap aitqanda, jýrnalister onyń túrmede eńbek etetin-etpeitinin, qandai jumyspen ainalysatynyn, jalaqy alatynyn jáne bos ýaqytyn qalai ótkizetinin bilmek bolǵan.
Sondai-aq burynǵy sheneýniktiń kitaphanadan qandai kitaptar alyp oqityny, túrmedegi jaǵdaiyna shaǵymdanǵan-shaǵymdanbaǵany týraly da suraqtar qoiylǵan. Alaida vedomstvo bul málimetterdiń eshqaisysyn ashyp aitpady.
Másimovtiń qaida otyrǵany nege jasyryldy?
Qylmystyq-atqarý júiesi komiteti tóraǵasynyń orynbasary Sergei Vargo burynǵy UQK basshysynyń naqty qai koloniiada jáne Qazaqstannyń qai óńirinde jazasyn ótep jatqanyn jariialamaǵan.
Degenmen vedomstvo Másimovtiń áli de qamaýda ekenin rastady.
"Saýalda kórsetilgen sottalǵan azamat zańdy kúshine engen sot aktilerine sáikes qylmystyq-atqarý júiesi mekemesinde jazasyn ótep jatyr", – delingen resmi jaýapta.
Komitet ókilderi mundai málimetter sottalǵan adamnyń jeke isine qatysty ekenin jáne zań boiynsha jariia etýge jatpaitynyn túsindirgen.
Kárim Másimov ne úshin sottalǵan?
Eske salaiyq, 2023 jylǵy 24 sáýirde Kárim Másimov 18 jylǵa bas bostandyǵynan aiyryldy. Sot ony memleketke opasyzdyq jasaý, bilikti kúshpen basyp alý jáne laýazymdyq ókilettikterin asyra paidalaný baptary boiynsha kináli dep tanyǵan.
Sot sheshimimen burynǵy UQK tóraǵasynyń múlki tárkilenip, memlekettik qyzmette laýazym atqarý quqyǵynan ómir boiyna aiyryldy.
