Astanada júrgizýshi kýáligin zańsyz rásimdeýmen ainalysqan uiymdasqan qylmystyq toptyń isi tergelip, sotqa joldandy. Tergeý deregine sáikes, 2025 jyly osy shema arqyly 74 adam júrgizýshi kýáligin zańsyz alǵan, dep habarlaidy dalanews.kz.
Qala prokýratýrasynyń baspasóz qyzmetiniń málimetinshe, Ulttyq qaýipsizdik komitetiniń departamenti prokýratýranyń úilestirýimen qylmystyq isti tergeýdi aiaqtaǵan. Qylmystyq toptyń quramynda mamandandyrylǵan halyqqa qyzmet kórsetý ortalyǵynyń qyzmetkerleri men deldaldar bolǵan.
Tergeý barysynda top músheleriniń rólderi aldyn ala bólingeni anyqtalǵan. Deldaldar arnaiy HQKO ǵimaratynyń mańynda turyp, júrgizýshi kýáligin alýǵa úmitkerlerge teoriialyq emtihan suraqtarynyń jaýaptaryn aityp otyrǵan. Al ortalyq qyzmetkerleri aqparattyq júiege úmitkerlerdiń praktikalyq emtihannan ótkeni týraly kórineý jalǵan málimetter engizgen.
Kúdiktilerdiń áreketteri Qylmystyq kodekstiń 262-baby (uiymdasqan topty qurý jáne oǵan basshylyq etý, sondai-aq oǵan qatysý) jáne 206-baby (aqparatty zańsyz joiý nemese ózgertý) boiynsha saralanǵan.
Alty adam qamaýǵa alynǵan. Taǵy úsheýine elden ketpeý týraly qolhat túrindegi bultartpaý sharasy qoldanylsa, bir adam úiqamaqqa alynǵan.
Zańsyz jolmen júrgizýshi kýáligin alǵan 74 adamnyń qujattarynyń kúshi joiylǵan. Qylmystyq is máni boiynsha qaraý úshin sotqa jiberildi.
