Qazaqstannyń 20 óńirinde erekshe bilim berý qajettilikteri bar balalarǵa arnalǵan jańa formattaǵy arnaiy mektepter salý josparlanyp otyr, dep habarlaidy dalanews.kz.
Úkimettiń baspasóz qyzmetiniń málimetinshe, bul týraly Úkimet otyrysynda oqý-aǵartý ministri Juldyz Súleimenova málimdedi.
Búginde elimizde erekshe bilim berý qajettilikteri bar 237 myńnan astam bala turady. Olarǵa qoldaý kórsetetin 541 arnaiy uiym jumys isteidi.
Prezident Joldaýyn iske asyrý aiasynda 20 óńirde jalpy 1 myń oryndyq jańa formattaǵy arnaiy mektepter salý kózdelgen. Sonymen qatar oblystarda 600 oryndyq ońaltý jáne saýyqtyrý kabinetteri bar uiymdar ashý josparlanyp otyr.
Erekshe bilim berý qajettilikteri bar balalarmen jumys isteitin mamandardy daiarlaýǵa da basymdyq beriledi. Qazir mundai mamandar 17 pedagogikalyq joǵary oqý ornynda jáne 9 kolledjde daiyndalady. 2027 jyly kolledjder 500-den astam logoped daiarlaýdy josparlap otyr.
Balalarǵa jeke qoldaý kórsetýde pedagog-assistentterdiń róli de mańyzdy. Qazirgi ýaqytta bilim berý uiymdarynda 7,5 myń pedagog-assistent jumys isteidi. Biylǵy oqý jylynda alty kolledjde osy mamandyq boiynsha kadr daiarlaý bastalyp, 210 stýdent qabyldanǵan.
Sonymen qatar erekshe bilim berý qajettilikterin erte anyqtaý úshin psihologiialyq-meditsinalyq-pedagogikalyq konsýltatsiialar ashý normativteri qaita qaralady. Qazir bir konsýltatsiia ashý normativi 50 myń balaǵa shaqqanda belgilense, ony 40 myń balaǵa shaqqandaǵy eseppen ózgertý kózdelip otyr.
Arnaiy uiymdardyń materialdyq-tehnikalyq bazasyn jańǵyrtý jumystary da jalǵasady. 2024 jyly «Qazaqstan halqyna» qorynyń qoldaýymen 99 arnaiy mekteptiń oqý kabinetteri men sheberhanalary jańartylǵan.
Budan bólek, erekshe bilim berý qajettilikteri bar balalardy keshendi qoldaý júiesin jetildirý maqsatynda Inkliýzivti bilim berýdi damytýdyń 2026–2030 jyldarǵa arnalǵan vedomstvoaralyq keshendi jospary bekitildi. Qujat óńirlerde bilim berý qyzmetteriniń qoljetimdiligin arttyrýǵa baǵyttalǵan.
