Qazaqstan Prezidenti Qasym-Jomart Toqaev 28-30 qazan aralyǵynda Rejep Taiip Erdoǵannyń shaqyrýymen Túrkiiaǵa resmi saparmen bardy. Túrkiialyq Anadolu jáne TRT Haber basylymdary eki el basshylarynyń kezdesýine, keńeitilgen strategiialyq seriktestikti nyǵaitýǵa jáne qorǵanys ónerkásibi salasyndaǵy yntymaqtastyqqa nazar aýdardy, dep habarlaidy dalanews.kz.
Erdoǵannyń ózi saltanatty túrde qarsy aldy
Anadolu agenttigi málimetinshe, Toqaevty Ankaradaǵy Etimesgýt áýejaiynda Túrkiia Prezidenti Rejep Taiip Erdoǵannyń ózi qarsy aldy. Memleket basshysynyń qurmetine saltanatty rásim uiymdastyrylyp, Qazaqstan men Túrkiianyń memlekettik ánurandary oryndaldy. Qurmet qaraýyly sap túzep, Toqaev áskeri qyzmetshilermen sálemdesti. Rásim barysynda 21 artilleriialyq zalp berildi.
28 qazanda eki el prezidenti Ankaradaǵy Prezident saraiynda jeke kezdesý ótkizip, keiin delegatsiialarmen kelissózder júrgizdi. Anadolu agenttiginiń jazýynsha, taraptar ekijaqty qarym-qatynastardy, sondai-aq, óńirlik jáne jahandyq máselelerdi talqylady.
Erdoǵan Qazaqstan men Túrkiia arasyndaǵy keńeitilgen strategiialyq seriktestikti odan ári nyǵaitý qajettigin atap ótti. Ol saýda, investitsiia, energetika, kólik jáne qorǵanys ónerkásibi salalaryndaǵy yntymaqtastyqty damytýǵa basymdyq beriletinin aitty.
Túrkiia Prezidenti Ankaranyń Túrki memleketteri uiymyna tóraǵalyǵy kezinde uiymnyń aqsaqaldar keńesiniń jumysyn jandandyrýǵa kúsh salatynyn, bul baǵytta Qazaqstanmen tyǵyz bailanys jalǵasatynyn da jetkizdi. Sonymen qatar, Erdoǵan Qasym-Jomart Toqaevty Antaliada 11-12 qarashada ótetin COP31 halyqaralyq klimattyq sammitine shaqyrdy.
Eki el saýda men qorǵanys salasyndaǵy yntymaqtastyqty nyǵaitpaq
Túrkiianyń qorǵanys ónerkásibi salasyndaǵy yntymaqtastyqqa da erekshe nazar aýdaryldy. Túrkiia Prezidenti Ákimshiliginiń Qorǵanys ónerkásibi basqarmasynyń basshysy Halýk Górgún Qazaqstanmen birlesken jumysty keńeitip, tereńdetýge nietti ekenin málimdedi.
Cýret: aa.com.tr
Onyń aitýynsha, qorǵanys ónerkásibi eki el arasyndaǵy mańyzdy yntymaqtastyq baǵyttarynyń biri sanalady. Górgún Túrkiianyń sońǵy shirek ǵasyrda básekege qabiletti ónimder shyǵarýǵa jáne birlesken óndiristi qoldaýǵa negizdelgen qorǵanys ónerkásibin qalyptastyrǵanyn atap ótti.
Ol Qazaqstanmen ózara tiimdilik qaǵidaty negizinde yntymaqtastyqty nyǵaitý eki eldiń qaýipsizdigi men túrki áleminiń ál-aýqatyna úles qosatynyn aitty.
Qasym-Jomart Toqaevtyń Túrkiiaǵa sapary 30 qazanǵa deiin jalǵasady. Sapar aiasynda Qazaqstan Prezidenti Túrki memleketteri uiymynyń 13-sammitine qatysady.
