Pavlodar oblysynyń Mai aýdanynda máslihat depýtattyǵyna kandidat retinde qujat tapsyrýǵa barǵan Baǵlan Ziiabekov politsiia bólimine kúshtep jetkizilgenin málimdedi. Oqiǵa týraly videony qoǵam belsendisi Ońǵar Qabden áleýmettik jelide jariialady, dep habarlaidy dalanews.kz.
Baǵlan Ziiabekovtiń aitýynsha, oqiǵa 2026 jylǵy 27 qazanda №6 okrýgtik sailaý komissiiasynyń ǵimaratynda bolǵan. Bul kúni kandidattardan qujat qabyldaý merzimi aiaqtalýǵa tiis bolǵan.
"Depýtattyqqa sailaýǵa qatysý úshin qujat tapsyratyn kezde Ulttyq qaýipsizdik komitetiniń qyzmetkeri bastaǵan politsiia qyzmetkerleri qolymdy qaiyryp, sailaý komissiiasynyń ǵimaratynan politsiia bólimine alyp ketti", – dedi ol videoda.
Baǵlan Ziiabekov óziniń 2023 jyly Mai aýdandyq máslihatynyń depýtattyǵyna sailanǵanyn aitty. Onyń sózinshe, sol kezdegi sailaýda AMANAT partiiasy aýdandyq filialynyń basshysymen básekege túsip, sailaýshylardyń basym daýysyn jinaǵan.
"2023 jyly Pavlodar oblysy Mai aýdandyq máslihatynyń depýtattyǵyna AMANAT partiiasynyń basshysymen birge sailaýǵa tústim. Turǵyndardyń qoldaýymen aiqyn basymdyqpen jeńip, depýtat atandym. Depýtat bolǵan kezimde jemqorlyqqa qatysty máselelerdi ashyq kóterip, ádil sailaý týraly birneshe ret aittym", – dedi Ziiabekov.
Onyń málimdeýinshe, depýtattyq ókilettigi toqtaǵannan keiin qaitadan sailaýǵa qatysý úshin 27 qazanda №6 okrýgtik sailaý komissiiasyna qujat tapsyrýǵa barǵan. Alaida komissiia ornalasqan ǵimaratqa jetpei jatyp, belgisiz adamdar onyń jolyn bógemek bolǵan.
"Bara jatqan jolymda beitanys adamdar meni toqtatýǵa áreket jasady. Kedergilerge qaramastan, №6 okrýgtik sailaý komissiiasynyń ǵimaratyna kirdim. Ótinish blankisin suraǵanymda, qyzmetkerler kompiýter jumys istemei turǵanyn aityp, bere almady", – deidi ol.
Budan keiin ǵimaratqa politsiia qyzmetkerleri kelgen. Ziiabekovtiń sózinshe, tártip saqshylary ony sol jerden alyp ketýge áreket jasaǵan. Al sailaý komissiiasynyń ókilderi noýtbýktiń qupiiasózin umytyp qalǵanyn jáne ótinishti basyp shyǵara almai otyrǵanyn aityp, kúte turýyn suraǵan.
"Aýdandyq sailaý komissiiasynyń basshysy Marina Valerevnaǵa shaǵymdanyp, maǵan nege ótinish berilmei jatqanyn túsindirýdi suradym. Ózimniń azamattyq quqyǵymdy talap ettim. Keiin ǵimaratta dabyl qaǵylyp, órt sóndirý kólikteri keldi. Bizdi syrtqa shyǵýǵa májbúrledi", – dedi Baǵlan Ziiabekov.
Onyń aitýynsha, ǵimarattan shyqqannan keiin ózin Ulttyq qaýipsizdik komitetiniń qyzmetkeri retinde tanystyrǵan Ersinbek esimdi adam politsiia ókilderimen sóilesken. Osydan soń tártip saqshylary onyń qolyn qaiyryp, politsiia bólimine alyp ketken.
Qoǵam belsendisi Ońǵar Qabdenniń jazýynsha, Baǵlan Ziiabekov politsiia bóliminen sol kúni saǵat 18:00-de bosatylǵan. Al aýmaqtyq sailaý komissiiasynyń tóraǵasy Ziiabekov saǵat 18:05-te kelgenin alǵa tartyp, onyń ótinishin qabyldaýdan bas tartqan. Qujat qabyldaýdyń sońǵy kúni 27 qazan bolǵan.
Ońǵar Qabden Baǵlan Ziiabekovtiń 2018 jyly arnaiy baǵdarlama boiynsha Jetisaidan Pavlodar oblysynyń Mai aýdanyna kóship kelgenin jazdy. Belsendiniń málimetinshe, Ziiabekov depýtat bolǵan kezinde quny 610 million teńge bolatyn aýrýhananyń drenaj júiesine jáne 200 million teńgeden astam qarjy jumsalǵan ponton kópiriniń qurylysyna qatysty máselelerdi kótergen.
Ázirge Pavlodar oblysynyń politsiia departamenti, Ulttyq qaýipsizdik komitetiniń aýmaqtyq organy jáne oblystyq sailaý komissiiasy Baǵlan Ziiabekov pen Ońǵar Qabdenniń málimdemesine resmi túsinikteme bergen joq.
